அனோஜன் தொடர்பில் அரசியல்வாதிகள், ஊடகவியலாளர்கள் தெரிவித்ததாகப் பகிரப்படும் கருத்துக்கள் உண்மையா?

Subscribe to our WhatsApp Channel

INTRO

இஸ்லாம் மதத்தையும் அதன் மதத் தலைவர்களில் ஒருவரையும் அவமதித்ததாக குற்றம் சாட்டப்பட்டிருந்த, சவுதி அரேபியாவில் பணியாற்றி வந்த இலங்கையைச் சேர்ந்த சிவராசா அனோஜன் என்ற இளைஞருக்கு, சவுதி அரேபியாவின் அல்-அஹ்சா (Al-Ahsa) குற்றவியல் நீதிமன்றம் 5 ஆண்டுகள் சிறைத்தண்டனையும், 3 மில்லியன் சவுதி ரியால் அபராதமும் விதித்திருந்தது.

அந்த ஆரம்பத் தீர்ப்புக்கு எதிராக தாக்கல் செய்யப்பட்ட மேல்முறையீட்டைத் தொடர்ந்து, சவுதி மேல்முறையீட்டு நீதிமன்றம் குறித்த தண்டனையை மரண தண்டனையாக அதிகரித்துள்ளதாக அந்த இளைஞரின் குடும்ப உறுப்பினர்கள் தெரிவித்துள்ளனர்.

இந்தச் சம்பவம் தொடர்பாக சமூக ஊடகங்களில் கடுமையான விவாதங்கள் இடம்பெற்று வரும் நிலையில், அரசியல்வாதிகள் மற்றும் ஊடகவியலாளர்கள் உள்ளிட்டோர் வெளியிட்டதாகக் குறிப்பிடப்படும் பல்வேறு பதிவுகளும் சமூக ஊடகங்களில் பகிரப்பட்டு வருவதை அவதானிக்க முடிந்தது. 

எனவே இந்த பதிவுகள் தொடர்பான உண்மையை அறிய ஃபேக்ட் கிரஸண்டோ நிறுவனம் ஆய்வொன்றை மேற்கொண்டது.

தகவலின்விவரம் (What is the claim):
CLAIM – 1

Facebook | Archived Link  

“சவுதி அரேபியா இலங்கை போன்ற பல மதங்கள் கொண்ட நாடு அல்ல. ஒரு முஸ்லிம் நாட்டிற்குச் சென்று இஸ்லாம் மதத்தை அவமதிப்பதை ஏற்றுக்கொள்ள முடியாது. அவருக்கு பொருத்தமான தண்டனை வழங்கப்பட்டுள்ளது” என மின்சக்தி பிரதி அமைச்சர் அர்கம் இலியாஸ் அவர்கள் மேற்கண்ட சம்பவம் தொடர்பாக கருத்து தெரிவித்ததாகக் குறிப்பிடும் பதிவு ஒன்று சமூக ஊடகங்களில் பகிரப்பட்டிருந்தது. 

Claim 2 

Facebook | Archived Link 

“அனோஜன் குறித்து சவுதி அரசாங்கத்திற்கு தகவல் வழங்கியது, முஸ்லிம் பெயர்களில் தோற்றமளித்த புத்த மத தீவிரவாதிகள் – முன்னாள் அமைச்சர் அவரது தாயாரிடம் தெரிவிப்பு” எனக் குறிப்பிடப்பட்ட சமூக ஊடகப் பதிவு ஒன்று, முன்னாள் அமைச்சரும் நாடாளுமன்ற உறுப்பினருமான ரிஷாட் பதியுதீன் அவர்களின் புகைப்படத்துடன் சமூக ஊடகங்களில் பகிரப்பட்டிருந்தது. 

claim 3

Facebook  Facebook | Archived Link 

Fact Check (உண்மை அறிவோம்)

claim 1

சிவராசா அனோஜன் என்ற இளைஞர் தொடர்பாக இலங்கையின் பிரதான ஊடகங்கள் உள்ளிட்ட சமூக ஊடகங்களில் பரவலாக விவாதங்கள் இடம்பெற்று வரும் நிலையில், மின்சக்தி பிரதி அமைச்சர் இவ்வாறானதொரு கருத்தைத் தெரிவித்திருந்தால், அது தொடர்பாக பிரதான ஊடகங்களில் செய்தி வெளியாகியிருக்கும். நாங்கள் மேற்கொண்ட ஆய்வில், பிரதி அமைச்சர் இவ்வாறானதொரு கருத்தைத் தெரிவித்ததாக பிரதான ஊடகங்கள் அல்லது அதிகாரப்பூர்வமான நம்பகமான ஆதாரங்கள் எதிலும் செய்தி வெளியாகவில்லை என்பது தெளிவாகியது. 

Hiru News அவ்வாறான பதிவுகளை வெளியிட்டிருக்கவில்லை

மேலும், மேற்கண்ட பதிவு Hiru News ஊடகத்தின் வடிவமைப்பை ஒத்த வகையில் உருவாக்கப்பட்டிருந்தது. இதுபோன்றதொரு பதிவை Hiru ஊடக நிறுவனம் வெளியிட்டுள்ளதா என்பதையும் நாங்கள் ஆய்வு செய்தோம். அந்த ஆய்வில், Hiru ஊடக நிறுவனம் அவ்வாறான எந்தவொரு பதிவையும் வெளியிடவில்லை என்பது தெளிவாகியது.

மின்சக்தி பிரதி அமைச்சர் அர்கம் இலியாஸ்

பகிரப்பட்டு வரும் சமூக ஊடகப் பதிவு பொய்யானது எனத் தெரிவித்து, பிரதி அமைச்சர் அர்கம் இலியாஸ் அவர்களின் அதிகாரப்பூர்வ சமூக ஊடகப் பக்கத்திலும் பதிவு ஒன்று வெளியிடப்பட்டுள்ளது.

Facebook 

இது தொடர்பாக மின்சக்தி பிரதி அமைச்சர் அர்கம் இலியாஸ் அவர்களின் ஊடகச் செயலாளரிடம் நாங்கள் மேற்கொண்ட விசாரணையின்போது, மேற்கண்ட கருத்து முற்றிலும் பொய்யானது என்றும், பிரதி அமைச்சர் அவ்வாறான எந்தவொரு கருத்தையும் தெரிவிக்கவில்லை என்றும் அவர் தெரிவித்தார். 

claim 2

நாடாளுமன்ற உறுப்பினர் ரிஷாட் பதியுதீன் அவர்கள் அம்பாறை, கல்முனை, நற்பிட்டிமுனையில் அமைந்துள்ள அனோஜனின் வீட்டிற்குச் சென்று அவரது குடும்பத்தினரைச் சந்தித்துள்ளதாக பிரதான ஊடகங்களிலும் செய்திகள் வெளியாகியிருந்தன. இதன்போது அவர் அனோஜனின் தாயார், சகோதர சகோதரிகள் உள்ளிட்ட குடும்ப உறுப்பினர்களைச் சந்தித்து கலந்துரையாடியுள்ளார். ரிஷாட் பதியுதீன் அவர்கள் அங்கு அந்த இளைஞரின் தாயார் மற்றும் ஏனைய குடும்ப உறுப்பினர்களிடம் தெரிவித்த கருத்துகளும் ஊடகங்களில் செய்தியாக வெளியாகியிருந்தன.

மேற்கண்ட பதிவில் குறிப்பிடப்பட்டுள்ள வகையிலான கருத்தை அவர் தெரிவித்திருந்தால், அது தொடர்பாகவும் பிரதான ஊடகங்களில் செய்திகள் வெளியாகியிருக்க வேண்டும். எனினும், நாங்கள் மேற்கொண்ட ஆய்வில், பதியுதீன் அவர்கள் மேற்கண்ட பதிவில் குறிப்பிடப்பட்டுள்ள வகையிலான கருத்தைத் தெரிவித்ததாக எந்தவொரு அதிகாரப்பூர்வமான நம்பகமான ஊடகத்திலும் செய்தி வெளியாகவில்லை என்பது தெளிவாகியது. அதேவேளை, அவர் தனது குடும்பத்தினரைச் சந்தித்து தெரிவித்த கருத்துகளிலும் மேற்கண்ட வகையிலான எந்தவொரு கருத்தையும் காண முடியவில்லை.

சவுதி அரேபியாவில் அனோஜனுக்கு மரண தண்டனை விதிக்கப்பட்டுள்ளதாக வெளியான செய்திகள் தொடர்பாக, அனோஜனின் குடும்பத்தினர் எதிர்கொண்டுவரும் கடுமையான மன அழுத்தத்தின் மத்தியில், அவர்களுக்கு, தன்னுடைய மற்றும் முஸ்லிம் சமூகத்தினரினது ஆதரவு, அனுதாபம் மற்றும் உறுதியைத் தெரிவிப்பதற்காகவே ரிஷாட் பதியுதீன் அவரது வீட்டிற்குச் சென்றுள்ளார். ரிஷாட் பதியுதீன் அவர்கள் அந்த இளைஞரின் குடும்பத்தினரைச் சந்தித்தபோது தெரிவித்த கருத்து கீழே வழங்கப்பட்டுள்ளது.

Facebook 

ரிஷாட் பதியுதீன் அவர்கள் குடும்பத்தினரிடம் கூறியது என்ன?

அந்த இளைஞரை காப்பாற்றுவதற்காக சவுதி அரேபிய அரசாங்கம் மற்றும் இலங்கை அரசாங்கத்தின் சம்பந்தப்பட்ட அதிகாரிகளுடன் நேரடியாகத் தொடர்புகொண்டு நடவடிக்கை எடுத்து வருவதாக அவர் குடும்பத்தினரிடம் உறுதியளித்தார். இலங்கையில் உள்ள அனைத்து முஸ்லிம் நாடாளுமன்ற உறுப்பினர்களையும் ஒரே மேடைக்குக் கொண்டு வந்து, ஜனாதிபதி அனுர குமார திசாநாயக்க அவர்களிடமும் சவுதி அரேபியாவின் மன்னர் சல்மான் அவர்களிடமும் அனோஜனுக்காக விசேட மனிதாபிமான கோரிக்கையை முன்வைக்க நடவடிக்கை எடுப்பதாக அவர் தெரிவித்தார்.

சட்ட மற்றும் மதப் பின்னணியைக் கொண்ட இந்த நெருக்கடிக்கு தீர்வு காண்பதற்காக, அகில இலங்கை ஜம்இய்யத்துல் உலமா சபையின் தலையீட்டையும் ஆதரவையும் பெற்றுக்கொள்ள எதிர்பார்ப்பதாகவும் அவர் தெரிவித்தார்.

மேலும், நாடாளுமன்ற உறுப்பினர்களான மனோ கணேசன், சாணக்கியன் இராசமாணிக்கம் மற்றும் கஜேந்திரகுமார் பொன்னம்பலம் ஆகியோருடனும் தான் தொலைபேசி மூலம் கலந்துரையாடியதாகவும், இன, மத வேறுபாடுகளின்றி அனைத்து தரப்பினரும் ஒன்றிணைந்து அனோஜனின் உயிரைக் காப்பாற்றுவதற்காக பொதுவாக செயல்படுவதாகவும் பதியுதீன் அவர்கள் இதன்போது வலியுறுத்தினார்.

நாடாளுமன்ற உறுப்பினர் ரிஷாட் பதியுதீன் அவர்கள் சமூக ஊடகப் பதிவுகள் பொய்யானவை என்பதை உறுதிப்படுத்துகிறார்

மேற்கண்ட பதிவு தொடர்பாக நாங்கள் ரிஷாட் பதியுதீன் அவர்களின் ஊடகப் பிரிவினரிடம் விசாரித்தோம். இதன்போது, மேற்கண்ட பதிவில் குறிப்பிடப்பட்டுள்ள வகையிலான எந்தவொரு கருத்தையும் ரிஷாட் பதியுதீன் அவர்கள் தெரிவிக்கவில்லை என்றும், அந்தப் பதிவு முற்றிலும் தவறானது என்றும் அவர்கள் உறுதிப்படுத்தினர்.

சிவராசா அனோஜன் தொடர்பில் கருணையுடன் கவனம் செலுத்தி, அவருக்கு மன்னிப்பு வழங்குமாறு கோரி, சவுதி அரேபிய மன்னரிடம் சமர்ப்பிக்கப்படவுள்ள விசேட கடிதத்திற்காக நாடாளுமன்ற உறுப்பினர்களின் கையொப்பங்களைச் சேகரிக்கும் நடவடிக்கை தற்போது ஆரம்பிக்கப்பட்டுள்ளதாகத் தெரிவித்து, முன்னாள் அமைச்சரும் நாடாளுமன்ற உறுப்பினருமான ரிஷாட் பதியுதீன் அவர்கள் தனது அதிகாரப்பூர்வ பேஸ்புக் பக்கத்தில் பதிவு ஒன்றை வெளியிட்டுள்ளார்.

Claim 3

புலனாய்வு ஊடகவியலாளர் தரிந்து ஜயவர்தன அவர்கள் மேற்கண்ட பதிவில் குறிப்பிடப்பட்டுள்ள வகையிலான சர்ச்சைக்குரிய கருத்தைத் தெரிவித்திருந்தால், அது தொடர்பாக பிரதான ஊடகங்கள் மற்றும் அதிகாரப்பூர்வமான நம்பகமான ஆதாரங்களில் செய்தி வெளியாகியிருக்க வாய்ப்புள்ளது. அதன்படி, நாங்கள் மேற்கொண்ட ஆய்வில், எந்தவொரு நம்பகமான அதிகாரப்பூர்வ ஆதாரமும் குறித்த விடயம் தொடர்பாக செய்தி வெளியிடவில்லை என்பது தெளிவாகியது.

மேலும், ஊடகவியலாளர் தரிந்து ஜயவர்தன அவர்கள் சமூக ஊடகத் தளங்களில் தொடர்ச்சியாக கருத்துகளை வெளியிட்டு வருவதால், அவரது சமூக ஊடகப் பதிவுகளையும் நாங்கள் ஆய்வு செய்து, அவர் இவ்வாறானதொரு கருத்தைத் தெரிவித்துள்ளாரா என்பதை ஆராய்ந்தோம். இதன்போதும், அவர் மேற்கண்ட வகையிலான எந்தவொரு கருத்தையும் தெரிவிக்கவில்லை என்பது தெளிவாகியது.

அனோஜன் தொடர்பாக ஊடகவியலாளர் தரிந்து ஜயவர்தன அவர்கள் தெரிவித்தது என்ன?

எவ்வாறாயினும், ஊடகவியலாளர் தரிந்து ஜயவர்தன அவர்கள் யூடியூப் சமூக ஊடகத் தளத்தில் காணொளி ஒன்றை வெளியிட்டு, சிவராசா அனோஜன் என்ற இளைஞர் தொடர்பாக கருத்துகளைத் தெரிவித்துள்ளார். எனினும், அந்த முழுமையான காணொளியிலும் மேற்கண்ட வகையிலான எந்தவொரு கருத்தையும் அவர் தெரிவிக்கவில்லை. அந்தக் காணொளியில் அனோஜனின் சம்பவம் தொடர்பாக விளக்கமளித்த அவர், வெளிவிவகார அமைச்சு மற்றும் ரியாத்தில் அமைந்துள்ள இலங்கைத் தூதரகம் ஊடாக இந்த சட்ட நடவடிக்கையைத் தொடர்ந்து கண்காணித்து, அனோஜனின் உரிமைகளைப் பாதுகாப்பதற்காக நடவடிக்கை எடுத்து வருவதாக அரசாங்கம் அறிவித்துள்ளதாகக் குறிப்பிட்டுள்ளார்.

சமய மற்றும் கலாசார விவகாரங்களுக்கான பிரதி அமைச்சர் முனீர் முனவ்வர் அவர்களும் விசேட தலையீட்டை மேற்கொண்டு, அனோஜனுக்கு விதிக்கப்பட்டுள்ள தண்டனையைத் தளர்த்தி, அவரை மீண்டும் இலங்கைக்கு அழைத்து வருவதற்கான இராஜதந்திர பேச்சுவார்த்தைகளை ஆரம்பித்துள்ளதாகவும் அவர் குறிப்பிட்டுள்ளார். இதற்காக இலங்கை மற்றும் சவுதி அரேபியாவிலுள்ள முக்கிய முஸ்லிம் மதத் தலைவர்களின் நேரடி தலையீட்டைப் பெற்றுக்கொள்ளவும் நடவடிக்கைகள் மேற்கொள்ளப்பட்டு வருவதாகவும் அவர் தெரிவித்துள்ளார்.

அந்த முழுமையான காணொளி கீழே வழங்கப்பட்டுள்ளது.

YouTube 

புலனாய்வு ஊடகவியலாளர் தரிந்து ஜயவர்தன

தரிந்து ஜயவர்தன அவர்கள் மேற்கண்ட பதிவு தொடர்பாக பேஸ்புக்கில் பதிவொன்றை வெளியிட்டு, அந்தப் பதிவு முற்றிலும் பொய்யானது என்பதை உறுதிப்படுத்தியுள்ளார்.

Facebook 

இது தொடர்பாக நாங்கள் மேற்கொண்ட விசாரணையின்போதும், தரிந்து ஜயவர்தன அவர்கள் குறித்த பதிவு பொய்யானது என்பதை உறுதிப்படுத்தினார். 

சிவராசா அனோஜனுக்கு மரண தண்டனை விதிக்கப்பட்ட சம்பவம்

யாழ்ப்பாணத்திலிருந்து கதிர்காமம் வரை மேற்கொள்ளப்பட்ட பாத யாத்திரையின்போது நாய் ஒன்றைத் தொடர்புபடுத்தி இடம்பெற்ற சம்பவத்தை அடிப்படையாகக் கொண்டு, சவுதி அரேபியாவில் பணியாற்றி வந்த சிவராசா அனோஜன் என்ற இலங்கை இளைஞர் சமூக ஊடகங்களில் வெளியிட்ட பதிவு மற்றும் காணொளி மூலம் இஸ்லாம் மதத்தையும் அதன் மதத் தலைவர்களில் ஒருவரையும் அவமதித்ததாக குற்றச்சாட்டுகள் முன்வைக்கப்பட்டுள்ளன. பின்னர் அனோஜன் அந்தப் பதிவை நீக்கி, பகிரங்கமாக மன்னிப்புக் கோரி காணொளி ஒன்றையும் வெளியிட்டிருந்தார். அந்தக் காணொளி பிரதான ஊடகங்களில் இவ்வாறு வெளியிடப்பட்டிருந்தது.

இது தொடர்பாக சவுதி அரேபியாவின் அல்-அஹ்சா (Al-Ahsa) குற்றவியல் நீதிமன்றம் அவருக்கு 5 ஆண்டுகள் சிறைத்தண்டனையும், 3 மில்லியன் சவுதி ரியால் அபராதமும் விதித்திருந்தது. அந்த ஆரம்பத் தீர்ப்புக்கு எதிராக தாக்கல் செய்யப்பட்ட மேல்முறையீட்டைத் தொடர்ந்து, சவுதி மேல்முறையீட்டு நீதிமன்றம் குறித்த தண்டனையை மரண தண்டனையாக அதிகரித்துள்ளதாக அவரது குடும்ப உறுப்பினர்கள் தெரிவித்துள்ளனர். இது தொடர்பான ஊடகச் செய்திகளை இங்கே மற்றும் இங்கே காணலாம்.

இது தொடர்பாக இலங்கை அரசாங்கம் மேற்கொண்டுள்ள நடவடிக்கைகள் மற்றும் அறிவிப்புகள்

அனோஜனின் குடும்ப உறுப்பினர்களுடன் தொடர்புகொண்டு, இது தொடர்பாக மேல்முறையீடு ஒன்றைத் தாக்கல் செய்வதற்காக இலங்கைத் தூதரகமும் சட்டத்தரணிகள் குழுவும் தற்போது நடவடிக்கைகளை மேற்கொண்டு வருகின்றன. அனோஜனின் நீதிமன்ற நடவடிக்கைகளைத் தொடர்ந்து உன்னிப்பாகக் கண்காணித்து வருவதாகவும் வெளிவிவகார அமைச்சு அறிவிப்பு ஒன்றின் மூலம் தெரிவித்துள்ளது.

சட்ட நடவடிக்கைகளுக்கு மேலதிகமாக, சவுதி அரேபிய மன்னரிடம் அரச மன்னிப்பைப் பெற்றுக்கொள்வது அல்லது தண்டனையைத் தளர்த்துவது தொடர்பாக இராஜதந்திர மட்டத்தில் பேச்சுவார்த்தைகள் இடம்பெற்று வருவதாக அமைச்சரவைப் பேச்சாளரும் அமைச்சருமான நளிந்த ஜயதிஸ்ஸ அவர்களும் உறுதிப்படுத்தியுள்ளார். YouTube

இந்த விடயம் தொடர்பாக ஆதரவு வழங்குமாறு இலங்கைக்கான சவுதி அரேபிய தூதரகம், அகில இலங்கை ஜம்இய்யத்துல் உலமா அமைப்பு (ACJU), தேசிய ஷூரா சபை மற்றும் இலங்கை முஸ்லிம் ஊடக மன்றம் ஆகியவற்றிடமும் எழுத்துமூலம் கோரிக்கைகள் முன்வைக்கப்பட்டுள்ளதாக அதில் தெரிவிக்கப்பட்டுள்ளது. மேலதிக தகவல்கள் இங்கே.

அனோஜனை விடுதலை செய்யுமாறு கோரி அம்பாறை மற்றும் ஹட்டன் உள்ளிட்ட பல பகுதிகளில் பொதுமக்கள் போராட்டங்களும் தற்போது ஏற்பாடு செய்யப்பட்டுள்ளன. மேலதிக தகவல்கள் இங்கே.

எங்களது சமூகவலைதளபக்கங்களை பின்தொடர….

Facebook Page I Twitter Page I Instagram |  Google News Channel  |TikTok | Youtube

Conclusion: முடிவு

எனவே எமது ஆய்வின் அடிப்படையில் சவுதி அரேபியாவில் மரண தண்டனை விதிக்கப்பட்டுள்ள இலங்கை இளைஞரான சிவராசா அனோஜன் தொடர்பாக, பிரதி அமைச்சர் அர்கம் இலியாஸ், முன்னாள் அமைச்சரும் நாடாளுமன்ற உறுப்பினருமான ரிஷாட் பதியுதீன் மற்றும் ஊடகவியலாளர் தரிந்து ஜயவர்தன ஆகியோர் தெரிவித்ததாகக் குறிப்பிடப்பட்டு சமூக ஊடகங்களில் பகிரப்பட்டு வரும் மேற்கண்ட பதிவுகள் தவறானவை என்பது கண்டறியப்பட்டுள்ளது.

சிவராசா அனோஜனுக்கு விதிக்கப்பட்டுள்ள மரண தண்டனையைத் தளர்த்துவதற்காக அரசாங்கத்தினரும் எதிர்க்கட்சியைச் சேர்ந்த அரசியல்வாதிகளும் இராஜதந்திர மட்டத்தில் நடவடிக்கைகளை மேற்கொண்டு வருகின்றனர் என்பதுவும் குறிப்பிடத்தக்கது.

இவ்வாறான சந்தர்ப்பங்களில், இவற்றின் உண்மைத்தன்மையினை கண்டறிய எமது வாட்ஸ்அப் இலக்கத்திற்கு (+94721414696) தொடர்புகொள்ளுங்கள்.