දිනපතා සත්‍ය කරුණු දැන ගැනීමට අපගේ WhatsApp චැනලයටමෙතනින් එකතුවන්න.
චීනයේ China Merchants Port Holdings (CMPort) සමාගම කොළඹ වරායේ දකුණු ආසියානු වාණිජ හා සැපයුම් මධ්‍යස්ථාන (SACLH) ව්‍යාපෘතියෙන් ඉවත් වූ බව 2026 ඔක්තෝබර් 15 වැනිදා හොංකොං කොටස් හුවමාරුවට දැනුම් දුන් අතර, ශ්‍රී ලංකා වරාය අධිකාරිය එය ඔක්තෝබර් 19 වැනිදා තහවුරු කළේය. ඉන් පසු මේ සම්බන්ධයෙන් විවිධ අර්ථකථන සහිත සටහන් සමාජ මාධ්‍යයේ බහුලව බෙදා හැරිණි.
ඉවත්වීමට හේතුව රජයේ දුර්වල පරිපාලනය ද, ශ්‍රී ලංකාව චීන සමාගමට ඩොලර් මිලියන 22ක වන්දියක් ගෙවන්නේ ද, යන්න අපි නිල ලේඛන, රජයේ ප්‍රකාශ සහ චීන පාර්ශ්වයේ නිවේදන ඇසුරින් පරීක්ෂා කළෙමු.
සමාජ මාධ්‍ය සටහන් (Social Media Posts) :
එක් ෆේස්බුක් පිටුවක පළ වූ කාඩ්පතක දැක්වෙන්නේ “චීන ආයෝජකයෙකු ඩොලර් මිලියන 392ක ආයෝජන ඉවත්කරගනිමින් ලංකාවෙන් පිටවෙයි. හේතුව අනුරගේ රජයේ දුර්වල පරිපාලනය. වන්දි ලෙස අදාල ආයෝජකයාට ඩොලර් මිලියන 22ක්ද ගෙවයි” යනුවෙනි. තවත් සටහනක, “CANCELED” සහ “වන්දි මුදල ඇමෙරිකානු ඩොලර් මිලියන 21.9ක්” යන වචන සහිතව ශ්‍රී ලංකා වරාය අධිකාරිය ආයෝජකයන්ට වන්දි ගෙවිය යුතු බවයි.
Facebook 1 | Archived Link | Facebook 2
විමර්ශනයට ලක් කළ ප්‍රකාශය : රජයේ දුර්වල පරිපාලනය නිසා චීන ආයෝජකයෙකු ඩොලර් මිලියන 392ක ආයෝජනයක් ඉවත් කරගත් අතර, ශ්‍රී ලංකාව ඔහුට ඩොලර් මිලියන 22ක වන්දියක් ගෙවයි.
Fact Check (කරුණු පරීක්ෂාව) :
CMPort ඉවත්වීම සහ ගිවිසුම් අවසන් කිරීම නිල වශයෙන් තහවුරු වේ
China Merchants Port Holdings සමාගම 2026 ඔක්තෝබර් 15 වැනිදා හොංකොං කොටස් හුවමාරුවට ඉදිරිපත් කළ නිවේදනය අනුව, කොටස්කරුවන්ගේ ගිවිසුම, ඉදිකිරීම-ක්‍රියාත්මක කිරීම-පැවරීම (BOT – Build Operate Transfer) ගිවිසුම සහ ඉඩම් බදු ගිවිසුම කල් ඉකුත් වීමට පෙර අවසන් කර ඇත. මෙම නිවේදනයේ පළමු පිටුව පහත දැක්වේ. සම්පූර්ණ නිවේදනය මෙතනින්.
ව්‍යාපෘතිය අවසන් කිරීමට හේතු ලෙස එහි දක්වා ඇත්තේ බාහිර තත්ත්වයන්හි වෙනස්කම්, ව්‍යාපෘතිය ක්‍රියාත්මක කිරීමේ පරිසරයේ සහ කාලසටහනේ වෙනස්කම් සහ පාර්ශ්වයන්ගේ වාණිජ සලකා බැලීම් ය. දේශීය රජය සමඟ සාකච්ඡා කිරීමෙන් පසු, “සුහදව සාකච්ඡා කිරීම සහ මධ්‍යස්ථව කටයුතු කිරීම” යන මූලධර්ම මත ව්‍යාපෘතිය පිළිවෙළකට අවසන් කිරීමට පාර්ශ්ව එකඟ වූ බවත් එහි සඳහන් ය. නිවේදනයේ වන්දියක්, දඩයක් හෝ අලාභ ගෙවීමක් පිළිබඳව කිසිදු සඳහනක් නොමැත.
ඩොලර් මිලියන 21.9 චීන සමාගමට ගෙවන වන්දියක් නොව, කොටස්කරුවන් තිදෙනාටම ආයෝජන ආපසු ගෙවීමකි
ව්‍යාපෘති සමාගමේ 2025 දෙසැම්බර් 31 දිනට විගණනය කළ මූල්‍ය ප්‍රකාශන අනුව, කොටස්කරුවන් ඩොලර් මිලියන 37.14ක් ආයෝජනය කර තිබිණි. ඉන් ඩොලර් මිලියන 26ක් CMPort හි අනුබද්ධ සමාගම වන Fortune Centre Group Limited (FCGL) ද, ඩොලර් මිලියන 5.57 බැගින් ශ්‍රී ලංකා වරාය අධිකාරිය සහ Access Engineering PLC ද යොදවා තිබිණි.
පියවීම අනුව, කොටස්කරුවන් ආයෝජනය කළ ඩොලර් මිලියන 26ක මුදලින් වරාය අධිකාරිය දැනටමත් දේශීය ආදායම් දෙපාර්තමේන්තුවට ගෙවූ ඩොලර් මිලියන 3.9ක VAT බද්ද සහ ඩොලර් 195,000ක ප්‍රමාද ගෙවීම් වගකීම අඩු කර, ඉතිරි ඩොලර් මිලියන 21.905 දින 30ක් ඇතුළත ගෙවිය යුතු ය. මෙම මුදල ගෙවනුයේ චීන සමාගමට නොව, ව්‍යාපෘති සමාගම වන SACL වෙත ය. එය සමාගමේ ඉතිරිව ඇති ඩොලර් මිලියන 7.85ක මුදල් සමඟ එකතු කර කොටස් අනුපාතය අනුව බෙදා හරිනු ලැබේ.
| කොටස්කරු | කොටස | ආයෝජනය (US$) | ආපසු ලැබෙන මුදල (US$) |
|---|---|---|---|
| FCGL (CMPort) | 70% | මිලියන 26.00 | මිලියන 20.83 පමණ |
| ශ්‍රී ලංකා වරාය අධිකාරිය | 15% | මිලියන 5.57 | මිලියන 4.46 පමණ |
| Access Engineering PLC | 15% | මිලියන 5.57 | මිලියන 4.46 පමණ |
| එකතුව | 100% | මිලියන 37.14 | මිලියන 29.8 පමණ |
මූලාශ්‍ර: මෙතනින් (CMPort හොංකොං නිවේදනය). එකතුව: 21.905 + 7.85.
ඒ අනුව කිසිදු කොටස්කරුවෙකුට තම ආයෝජනය සම්පූර්ණයෙන් ආපසු නොලැබේ. CMPort හි අනුබද්ධ සමාගමට ඩොලර් මිලියන 5.2ක් පමණ අඩුවෙන් ලැබෙන අතර, Access Engineering සමාගම රුපියල් බිලියන 1.76ක ආයෝජනයෙන් බිලියන 1.45ක් පමණ ආපසු ලබමින් රුපියල් මිලියන 310ක පමණ පාඩුවක් වාර්තා කරන බව වාර්තා විය මෙතනින්.
අප විසින් සිදුකළ විමසීමේදී ශ්‍රී ලංකා වරාය අධිකාරියේ සන්නිවේදන සහ මහජන සබඳතා ප්‍රධානී U.L.D.C. සිල්වා මහතා පැවසුවේ, CMPort ව්‍යාපෘතියෙන් ඉවත් වීම සත්‍ය වුවද, ඩොලර් මිලියන 22ක් වන්දි ලෙස ගෙවන බව අසත්‍ය බවයි. චීන සමාගම බදු කුලී ලෙස මීට පෙර ගෙවා තිබූ ඩොලර් මිලියන 26ක මුදලින් බදු සහ හිඟ මුදල් අඩු කර එය ආපසු ගෙවන බව ඔහු පැවසීය. කෙසේ වෙතත්, හොංකොං නිවේදනය එම මුදල හඳුන්වන්නේ කොටස්කරුවන් කළ ආයෝජනයක් ලෙසයි. ව්‍යාපෘති සමාගම වෙනුවට වරාය අධිකාරිය එය ආපසු ගෙවන්නේ ඇයිද යන්න නිවේදනය පැහැදිලි නොකරයි.
පියවීම යටතේ වරාය අධිකාරිය VAT සහ ප්‍රමාද ගාස්තු ඇතුළුව ඩොලර් මිලියන 26ක් දරන අතර, කොටස්කරුවකු ලෙස ඩොලර් මිලියන 4.46ක් පමණ ආපසු ලබයි (අපගේ ගණනය). එම ඩොලර් මිලියන 26 වරාය අධිකාරියට කලින් ලැබුණු බදු කුලියක් නම්, මෙය අලුතින් දරන පාඩුවක් නොව, ලැබුණු මුදලක් ආපසු ගෙවීමකි. මෙම කොන්දේසිය තවමත් නිල වශයෙන් තහවුරු වී නොමැත.
ඩොලර් මිලියන 392 යනු වැය කළ මුදලක් නොව, සැලසුම් කළ මුළු ව්‍යාපෘති වියදමයි
2023 අප්‍රේල් 21 වැනිදා CMPort හොංකොං කොටස් හුවමාරුවට ඉදිරිපත් කළ නිවේදනයට අනුව, ව්‍යාපෘතියේ මුළු වියදම ඩොලර් මිලියන 392ක් ලෙස ඇස්තමේන්තු කර තිබූ අතර, ව්‍යාපෘති සමාගමේ කොටස් ප්‍රාග්ධනය ඩොලර් මිලියන 84ක් ලෙස සැලසුම් කර තිබිණි මෙතනින්. එහෙත් 2025 අවසානය වන විට සැබවින්ම ආයෝජනය කර තිබුණේ ඩොලර් මිලියන 37.14ක් පමණි.
වරාය අධිකාරියේ 2026 ඔක්තෝබර් 19 නිවේදනය ව්‍යාපෘතියේ ආයෝජනය ඩොලර් මිලියන 280ක් ලෙස දක්වයි. 2023 දෙසැම්බර් ගැසට් පත්‍රයට අනුව එය පළමු අදියරේ වියදම වන අතර, එය ණය 70 : කොටස් ප්‍රාග්ධනය 30 අනුපාතයට මූල්‍යනය කිරීමට නියමිත විය මෙතනින්. එබැවින් “ඩොලර් මිලියන 392ක් රටින් ඉවත් කරගත්තා” යන්න නිවැරදි නොවේ.
ව්‍යාපෘතිය 2023 ජනවාරි කැබිනට් තීරණයකින් ආරම්භ වී, 2023 අප්‍රේල් මාසයේ අත්සන් කෙරිණි
2023 ජනවාරි 23 වැනිදා කැබිනට් මණ්ඩලය, කොළඹ දකුණු වරායේ Batten Berg සහ Bloemendhal ප්‍රදේශ රාජ්‍ය-පෞද්ගලික හවුල්කාරිත්වයෙන් සංවර්ධනය කිරීම සඳහා CICT සමාගම ඉදිරිපත් කළ ඩොලර් මිලියන 150ක පළමු අදියර යෝජනාව, කැබිනට් පත් කළ සාකච්ඡා කමිටුවක නිර්දේශ මත අනුමත කළේය මෙතනින්. එනම් ව්‍යාපෘතිය විවෘත ලංසු කැඳවීමකින් නොව, ඉදිරිපත් වූ යෝජනාවක් සාකච්ඡා කිරීමෙන් ආරම්භ විය.
2023 අප්‍රේල් මාසයේ ශ්‍රී ලංකා වරාය අධිකාරිය, CMPort සහ Access Engineering අතර ගිවිසුම් අත්සන් කෙරිණි. වසර 50ක BOT කාලය තුළ ව්‍යාපෘති සමාගමට සුවිශේෂී මෙහෙයුම් අයිතියක් ද, ඩොලර් මිලියන 14ක මූලික රාජ්‍ය භාගයක් (royalty) වරාය අධිකාරියට ගෙවීමේ කොන්දේසියක් ද ගිවිසුමේ විය මෙතනින්. ව්‍යාපෘති සමාගම ගෙවන රාජ්‍ය භාගයට වඩා අඩු ගාස්තුවකට කොළඹ වරායේ සැපයුම් හෝ ගබඩා සේවා සැපයීමට වෙනත් පාර්ශ්වයකට අවසර දීම වරාය අධිකාරියට තහනම් විය.
2023 දෙසැම්බර් 22 දිනැති ගැසට් පත්‍රය මගින් ව්‍යාපෘතිය උපායමාර්ගික සංවර්ධන ව්‍යාපෘතියක් ලෙස නම් කර, වසර 15ක ආයතනික ආදායම් බදු සහ ලාභාංශ බදු සහන ලබා දුන්නේය මෙතනින්. වරායේ ප්‍රධාන ඉඩමක් ටෙන්ඩර් ක්‍රියාවලියකින් තොරව ලබා දුන් බවට වරාය වෘත්තීය සමිති 2023 මැයි මාසයේදීම විරෝධය පළ කළේය මෙතනින්.
බදු සහන, ඉඩම් ගැටලු සහ පරිපාලන ප්‍රමාද නිසා ව්‍යාපෘතිය වසර තුනක් පමණ ඇනහිටියේය
2023 දෙවන භාගයේ ආරම්භ කිරීමට නියමිත ව්‍යාපෘතිය, සහන අනුමැතිය සම්පූර්ණ නොවීම නිසා 2024 මාර්තු වන විටත් ආරම්භ වී නොතිබුණි මෙතනින්. ණය අර්බුදයෙන් පසු IMF මැදිහත්වීම හේතුවෙන් උපායමාර්ගික සංවර්ධන ව්‍යාපෘති සහන ඉවත් කළ බැවින් ආයෝජන මණ්ඩලයේ සාමාන්‍ය සහන ඉල්ලීමට සිදු වූ බව එවකට වරාය අධිකාරියේ සභාපතිවරයා 2025 ජනවාරියේ පැවසීය මෙතනින්.
ඉන් පසු පනවන ලද 2025 අංක 26 දරන උපායමාර්ගික සංවර්ධන ව්‍යාපෘති (සංශෝධන) පනත යටතේ, 2026 පෙබරවාරි 8 දිනැති රෙගුලාසි මගින් එවැනි ව්‍යාපෘතිවලට ලබා දිය හැකි ආයතනික ආදායම් බදු සහන කාලය වසර 5 සිට 10 දක්වා සීමා කෙරිණි මෙතනින්. 2023 දී මෙම ව්‍යාපෘතියට ලබා දුන් වසර 15ක සහනය එම නව සීමාවට වඩා වැඩි ය
අප විසින් සම්බන්ධ කරගත් වරාය හා සිවිල් ගුවන් සේවා අමාත්‍යවරයාගේ මාධ්‍ය ලේකම්වරයා පැවසුවේ, ඉඩ සීමිත කොළඹ වරාය තුළ සැපයුම් මධ්‍යස්ථානයක් ඉදිකිරීමෙන් තදබදය වැඩි විය හැකි බැවින් එය වරායට ආසන්න වෙනත් ස්ථානයකට ගෙන යාමට උත්සාහ කළ බවත්, නගරය තුළ එවැනි විශාල ඉඩමක් සොයාගැනීම අපහසු වූ බවත්, එයද ප්‍රමාදයට හේතුවක් වූ බවත් ය.
2026 මැයි 17 වැනිදා පළ වූ වාර්තාවක, ආයෝජන මණ්ඩලයේ අධ්‍යක්ෂ ජනරාල්වරිය සහ වරාය අධිකාරියේ සභාපතිවරයා ව්‍යාපෘතිය අවලංගු වූ බව තහවුරු කර තිබිණි මෙතනින්. ඔක්තෝබර් මාසයේ නිවේදනය එම තීරණය නිල වශයෙන් අවසන් කිරීමක් විය.
රජය පවසන්නේ, පැවති ගිවිසුම යටතේ ඉදිරියට යා නොහැකි වූ බවයි
සභානායක සහ අමාත්‍ය බිමල් රත්නායක මහතා 2026 ඔක්තෝබර් 21 වැනිදා පාර්ලිමේන්තුවේදී පැවසුවේ, නැගෙනහිර සහ බටහිර බහාලුම් පර්යන්ත අතර අක්කර 10ක ඉඩමක් ලබා දීමේ එකඟතාව රජය විරුද්ධ වීමට එක් හේතුවක් වූ බවයි. රජය ආයෝජනයට සහාය දුන් නමුත්, නිසි ක්‍රියාපටිපාටි අනුගමනය නොකළ බැවින් පැවති ගිවිසුම යටතේ ඉදිරියට යා නොහැකි වූ බව ද, ප්‍රශ්නකාරී ගිවිසුම් යටතේ ඉදිරියට යාම වෙනත් ආයෝජකයන් අධෛර්යමත් කළ හැකි බව ද ඔහු පැවසීය මෙතනින්.
එබැවින් ව්‍යාපෘතිය අවසන් වීමට වත්මන් රජයේ ස්ථාවරය ද එක් සාධකයක් බව රජයම පිළිගනී. ව්‍යාපෘතිය ඇනහිටීම 2023-2024 කාලයේම, පෙර රජය යටතේ ආරම්භ විය. විදේශ ආයෝජකයන් ඉවත්වීම පිළිබඳව විපක්ෂ නායක සජිත් ප්‍රේමදාස මහතා කනස්සල්ල පළ කළේය මෙතනින්. 2025 පෙබරවාරියේ Adani Green සමාගම ද ශ්‍රී ලංකාවේ පුනර්ජනනීය බලශක්ති ව්‍යාපෘතියකින් ඉවත් වූ බැවින්, ආයෝජක විශ්වාසය පිළිබඳ ප්‍රශ්නය සැබෑ විවාදයකි.
චීන පාර්ශ්වයේ එකම නිල ප්‍රකාශය CMPort හි හොංකොං නිවේදනය පමණි
මෙම ඉවත්වීම පිළිබඳව ශ්‍රී ලංකාවේ චීන තානාපති කාර්යාලයේ වෙබ් අඩවියේ 2026 ඔක්තෝබර් 27 දක්වා කිසිදු ප්‍රකාශයක් පළ වී නොමැත මෙතනින්. චීන විදේශ අමාත්‍යාංශයේ ප්‍රකාශයක් ද අපට හමු නොවීය. CMPort නිවේදනයේ චීන භාෂා පිටපතෙහි ද හේතු ලෙස දැක්වෙන්නේ ව්‍යාපෘතියේ “බාහිර පරිසරයේ වෙනස්කම්” සහ වාණිජ සලකා බැලීම් පමණි මෙතනින්. චීන භාෂා මාධ්‍ය ද වාර්තා කළේ එම නිවේදනයේ කරුණු පමණි මෙතනින්.
CMPort ව්‍යාපෘතිය අවසන් කළේ දේශීය රජය සමඟ සාකච්ඡා කර, පාර්ශ්ව සියල්ලේ යහපත උදෙසා බව ප්‍රකාශ කර ඇති අතර, එහි අධ්‍යක්ෂ මණ්ඩලය පියවීමේ කොන්දේසි සාමාන්‍ය වාණිජ කොන්දේසි බව සඳහන් කළේය. CMPort සමාගමේ ප්‍රමාණයට සාපේක්ෂව මෙම ගනුදෙනුව කුඩා එකක් වන අතර (සියලු අනුපාත සියයට 1ට අඩු), නිවේදනය නිකුත් කළේ පෙර ගිවිසුම් කලින් අවසන් කළ බැවිනි මෙතනින්. 2023 දී මෙම ව්‍යාපෘතිය මගින් දකුණු ආසියානු වරාය වෙළෙඳපොළේ සිය කොටස සහ කලාපීය බලපෑම වැඩි කර ගැනීමට අපේක්ෂා කළ බව සමාගම සඳහන් කර තිබිණි මෙතනින්. CMPort තවමත් කොළඹ CICT පර්යන්තයේ සියයට 85ක හිමිකරු වන අතර හම්බන්තොට වරාය ද කළමනාකරණය කරයි.
අප මේ පිළිබඳව චීන තානාපති කාර්යාලයෙන් විමසීමක් කර ඇති අතර ඔවුන් ලබා දෙන පිළිතුර සමගින් මෙම ලිපිය යාවත් කාලීන කිරීමට බලාපොරොත්තු වන්නෙමු.
භූ-දේශපාලනික පීඩනය හේතුව ද?
සමහර ඉන්දියානු මාධ්‍ය මෙම ඉවත්වීම “බාහිර පීඩන” නිසා සිදු වූවක් ලෙස මාතෘකා කළද, ඒවා පදනම් වූයේ නම් නොකළ නිරීක්ෂකයන්ගේ අදහස් මත ය මෙතනින්. චීනයේ “තීරුව සහ මාවත” ප්‍රවර්ධනය කරන ශ්‍රී ලාංකීය සංවිධානයක අධ්‍යක්ෂවරයෙකු ද, ඇමෙරිකානු අවධානය, IMF යටතේ බදු සහන කෙටි වීම සහ දේශීය පරිපාලන ප්‍රමාද යන සාධක තුනක් පෙන්වා දී ඇත මෙතනින්.
ඉඩම පිහිටියේ ඉන්දියාවේ Adani සමාගම ප්‍රමුඛ බටහිර පර්යන්තය අසල වීම කලාපීය සංවේදීතාවක් ඇති කළ හැකි වුවද, ඉන්දියාව හෝ ඇමෙරිකාව මෙම ව්‍යාපෘතියට විරුද්ධ වූ බවට ලේඛනයක් හෝ නිල ප්‍රකාශයක් අපට හමු නොවීය. CMPort නිවේදනය ද කිසිදු රටක් නම් නොකරයි.
රාජ්‍ය-පෞද්ගලික හවුල්කාරිත්ව ආකෘතියක් යටතේ නව සැපයුම් මධ්‍යස්ථානයක් සඳහා ලංසු කැඳවීමට නියමිත ය
ශ්‍රී ලංකා වරාය අධිකාරිය 2026 ඔක්තෝබර් 19 වැනිදා නිකුත් කළ නිවේදනයේ සඳහන් වන්නේ, තරගකාරී ලංසු කැඳවීමක් හරහා, අදාළ අනුමැතීන්ට යටත්ව, රාජ්‍ය-පෞද්ගලික හවුල්කාරිත්ව (PPP) ආකෘතියක් යටතේ කොළඹ වරාය තුළ නව සැපයුම් මධ්‍යස්ථානයක් සංවර්ධනය කරන බවයි.
රජයේ ප්‍රවෘත්ති දෙපාර්තමේන්තුව ද මේ බව වාර්තා කළේය මෙතනින්. නව ආයෝජකයෙකු තෝරාගෙන හෝ නව කාලසටහනක් එකඟ වී ඇති බවක් තවමත් වාර්තා වී නොමැත.
පවතින සාක්ෂිවල සීමාවන්
“බාහිර තත්ත්වයන්හි වෙනස්කම්” යනු නිශ්චිතවම කුමක්ද යන්න CMPort විස්තර නොකරයි. පියවීමේ ගිවිසුම අත්සන් කළ දිනය ද නිවේදනයේ සඳහන් නොවේ. ඩොලර් මිලියන 26ක මුදල වරාය අධිකාරියට ගෙවූ කොන්දේසිය, වරාය අධිකාරිය පියවීමේ මුදල සපයන ආකාරය සහ 2023 ගැසට් නිවේදනය අවලංගු කරන්නේද යන්න පිළිබඳව නිල පැහැදිලි කිරීමක් තවමත් නොමැත. නව තොරතුරු ලැබුණු විට මෙම ලිපිය යාවත්කාලීන කරන්නෙමු.
අපගේ කරුණු විමර්ශන පිළිබඳ තොරතුරු දැන ගැනීමට එක්වන්න
Facebook | Twitter | Instagram | Google News | TikTok
නිගමනය (Conclusion)
China Merchants Port Holdings සමාගම කොළඹ වරායේ SACLH ව්‍යාපෘතියෙන් ඉවත් වූ බව සත්‍ය ය. එහෙත් ඩොලර් මිලියන 21.905 යනු චීන සමාගමට ගෙවන වන්දියක් නොව, ව්‍යාපෘති සමාගමට ගෙවා කොටස්කරුවන් තිදෙනා අතර කොටස් අනුපාතයට බෙදා හරින ආයෝජන ආපසු ගෙවීමකි; කිසිදු කොටස්කරුවෙකුට තම ආයෝජනය සම්පූර්ණයෙන් නොලැබේ. ඩොලර් මිලියන 392 යනු සැලසුම් කළ වියදම මිස රටින් ඉවත් කරගත් මුදලක් නොවේ. CMPort හොංකොං නිවේදනයේ වන්දියක් හෝ දඩයක් පිළිබඳ කිසිදු සඳහනක් නොමැත.
2023 දී ටෙන්ඩර් රහිතව ආරම්භ කළ මෙම ව්‍යාපෘතිය බදු සහන, ඉඩම් සහ පරිපාලන ගැටලු නිසා වසර තුනක් පමණ ඇනහිටි අතර, පැවති ගිවිසුම යටතේ ඉදිරියට නොයන ලෙස රජය ද තීරණය කළේය. ඉවත්වීම “දුර්වල පරිපාලනයට” හෝ විදේශ රටක පීඩනයට පමණක් ආරෝපණය කිරීමට සාක්ෂි නොමැති අතර, චීන පාර්ශ්වයේ එකම නිල ප්‍රකාශය CMPort හි හොංකොං නිවේදනයයි. මෙම නිගමන CMPort හි 2023 සහ 2026 හොංකොං කොටස් හුවමාරු නිවේදන, කැබිනට් තීරණය, ගැසට් පත්‍ර, වරාය අධිකාරියේ නිවේදනය සහ පාර්ලිමේන්තුවේ අමාත්‍ය ප්‍රකාශය මත පදනම් වේ.
