INTRO :
ஆளும் கட்சியின் சில அரசியல் வாதிகளின் வயது என சமூகவலைத்தளங்களில் ஒரு தகவல் பகிரப்பட்டு வருகின்றமை காணக்கிடைத்தது.
எனவே குறித்த காணொளி தொடர்பில் உண்மையை அறிய ஃபேக்ட் கிரஸண்டோ நிறுவனம் ஆய்வொன்றை மேற்கொண்டது.
தகவலின்விவரம் (What is the claim):
சமூகவலைத்தளங்களில் “”வயதானவர்களை வீட்டுக்கு அனுப்பி இளைஞர்களை தெரிவு செய்யுங்கள் என்று சொல்லி வாக்குகளை எடுத்த பொய்யர்களின் ஆட்சியில் உள்ள இளைஞர்களின் வயதை பாருங்கள் நண்பர்களே ” என கடந்த ஆகஸ்ட் மாதம் 02 ஆம் திகதி 2026 ஆம் ஆண்டு (02.08.2026) பதிவேற்றம் செய்யப்பட்டிருந்தது.
இது உண்மையென நினைத்து பலர் பகிர்ந்திருந்தமையும் காணக்கிடைத்தது.
Fact Check (உண்மை அறிவோம்)
இணையத்தில் பகிரப்படும் குறித்த தகவலில் குறிப்பிடப்பட்டுள்ள அரசியல்வாதிகளில் டில்வின் சில்வா தவிர மற்ற அனைவரும் பாராளுமன்ற உறுப்பினர்கள் என்பதால், அவர்களின் சுயவிவரத் தகவல்கள் பாராளுமன்றத்தின் உத்தியோகப்பூர்வ இணையதளத்தில் பதிவேற்றப்பட்டுள்ளன.
அதன் மூலம் சமூகவலைத்தளத்தில் பதிவிட்டுள்ள பதிவில் தெரிவிக்கப்பட்டுள்ள வயதைச் சரிபார்க்க நடவடிக்கை எடுத்தோம்.
பாராளுமன்றத்தின் அதிகாரப்பூர்வ இணையதளம் வயது சரிபார்ப்பிற்கு நம்பகமான ஆதாரமாக அமைவது ஏன்?
இலங்கையின் சட்டமன்றத் துறையின் உயர் அமைப்பான பாராளுமன்றம், அதன் உறுப்பினர்களின் பெயர், பதவி, மாவட்டம் அல்லது தேசிய பட்டியல், கட்சி மற்றும் பிறந்த திகதி ஆகியவற்றை அந்த உறுப்பினரின் பெயரிலேயே உள்ள அதிகாரப்பூர்வ சுயவிவரப் பக்கத்தில் பதிவேற்றியுள்ளது. (வைத்தியர் ரிஸ்வி சாலி அவர்களின் பக்கத்தில் பிறந்த திகதி காணப்படவில்லை).
இது குறித்து நாம் தேசிய மக்கள் சக்தியின் (NPP) பேச்சாளரை தொடர்புக்கொண்டு வினவியபோது, அத்தகவல்கள் சரியானவை எனக் குறிப்பிட்டார். எனவே, பிறந்த திகதி உள்ள பாராளுமன்ற அதிகாரப்பூர்வ சுயவிவரப் பக்கங்கள் நமது முதன்மை ஆதாரமாக அமைந்துள்ளமை குறிப்பிடத்தக்கது.
பாராளுமன்ற அதிகாரப்பூர்வ தகவல்களின்படி 10 அரசியல்வாதிகளின் உண்மையான வயது, குறித்த பதிவில் காட்டப்பட்டுள்ள வயதை விடக் குறைவானதாகும்
● தேசிய பட்டியல் பாராளுமன்ற உறுப்பினர் சுகத் வசந்த டி சில்வா: தேசிய பட்டியல் பாராளுமன்ற உறுப்பினர் சுகத் வசந்த சில்வா, இலங்கை நாடாளுமன்ற வரலாற்றில் முதல் முறையாக பாராளுமன்ற உறுப்பினர் பதவிக்குத் தேர்ந்தெடுக்கப்பட்ட பார்வைச்சவாலுக்கு உட்பட்ட உறுப்பினராவார். குறித்த பதிவின்படி அவரது வயது 78 எனக் குறிப்பிடப்பட்டிருந்தாலும், பாராளுமன்ற அதிகாரப்பூர்வ இணையதளத்தின்படி அவர் 1967 ஜூலை 26 அன்று பிறந்துள்ளார். அதன்படி அவரது வயது 59 ஆகும்.
● தேசிய பட்டியல் பாராளுமன்ற உறுப்பினர் அபூபக்கர் அதம்பாவா:
பதிவில் அவரது வயது 77 எனக் குறிப்பிடப்பட்டிருந்தாலும், அவர் 1968 ஜனவரி 28 அன்று பிறந்துள்ளார். அதன்படி அவரது வயது 58 ஆகும்.
● பிரதி அமைச்சர் உபாலி சமரசிங்க: பதிவில் வயது 76 எனக் குறிப்பிடப்பட்டிருந்தாலும், பாராளுமன்ற இணையதளத்தின்படி அவர் 1967 டிசம்பர் 24 அன்று பிறந்துள்ளார். அதன்படி அவரது வயது 58 ஆகும்.
● அமைச்சர் அனுர கருணாதிலக: பதிவில் வயது 76 எனக் குறிப்பிடப்பட்டிருந்தாலும், அவர் 1967 டிசம்பர் 31 அன்று பிறந்துள்ளார். அதன்படி அவரது வயது 58 ஆகும்.
● அமைச்சர் ஹிணிதும சுனில் செனவி: வீடியோவில் வயது 76 எனக் குறிப்பிடப்பட்டிருந்தாலும், பாராளுமன்ற இணையதளத்தின்படி அவர் 1972 ஜூலை 21 அன்று பிறந்துள்ளார். அதன்படி அவரது வயது 54 ஆகும்.
● அமைச்சர் சுனில் குமார கமகே : பதிவில் வயது 76 எனக் குறிப்பிடப்பட்டிருந்தாலும், அவர் 1966 ஏப்ரல் 16 அன்று பிறந்துள்ளார். அதன்படி அவரது வயது 60 ஆகும்.
● பிரதி அமைச்சர் டி. பி. சரத்: பதிவில் வயது 75 எனக் குறிப்பிடப்பட்டிருந்தாலும், பாராளுமன்ற இணையதளத்தின்படி அவர் 1967 ஆகஸ்ட் 9 அன்று பிறந்துள்ளார். அதன்படி அவரது வயது 59 ஆகும்.
● பாராளுமன்ற உறுப்பினர் லக்ஷ்மன் நிபுண ஆராச்சி: சமூக ஊடக பதிவில் வயது 75 எனக் குறிப்பிடப்பட்டிருந்தாலும், அவர் 1965 ஏப்ரல் 4 அன்று பிறந்துள்ளார். அதன்படி அவரது வயது 61 ஆகும்.
● பிரதி அமைச்சர் சட்டத்தரணி சுனில் வடகல: குறித்த சமூகவலைத்தள பதிவில் வயது 70 எனக் குறிப்பிடப்பட்டிருந்தாலும், பாராளுமன்ற இணையதளத்தின்படி அவர் 1967 டிசம்பர் 16 அன்று பிறந்துள்ளார். அதன்படி அவரது வயது 58 ஆகும்.
● அமைச்சர் கே. டி. லால் காந்த: பதிவில் வயது 73 எனக் குறிப்பிடப்பட்டிருந்தாலும், பாராளுமன்ற இணையதளத்தின்படி அவர் 1964 ஆகஸ்ட் 18 அன்று பிறந்துள்ளார். அதன்படி அவரது வயது 62 ஆகும்.
மேற்குறிப்பிட்ட வயதுகள் 2026 அக்டோபர் 13 ஆம் திகதிக்கு கணக்கிடப்பட்டுள்ளன. அதன்படி, சமூக ஊடக பதிவில் குறிப்பிடப்பட்டுள்ள 10 பாராளுமன்ற உறுப்பினர்களின் வயதுகள் சரியானவை அல்ல என்பது நமது உண்மைச் சரிபார்ப்பில் தெரியவந்துள்ளது.
பாராளுமன்ற அதிகாரப்பூர்வ இணையத்தளத்தின் தரவுகளின் படி குறித்த பதிவில் இருக்கும் அரசியல்வாதிகளின் பிறந்த திகதிகளின்படி அவர்களின் வயது 54 முதல் 62 வரை ஆகும். இந்த சமூகவலைத்தள பதிவில் காட்டப்பட்டுள்ள வயதை விட 11 முதல் 22 வருடங்கள் வரை குறைவானதாகும்.
மேற்படி அரசியல்வாதிகளின் வயது குறித்து நாம் தேசிய மக்கள் சக்தியின் (NPP) ஊடகப் பிரிவினரை நாம் தொடர்புக்கொண்டு வினவியதில், அதன் ஊடக ஒருங்கிணைப்பாளர், குறித்த பதிவில் குறிப்பிடப்பட்டுள்ள வயதுகள் சரியானவை அல்ல எனத் தெரிவித்தார். மேலும், பாராளுமன்ற அதிகாரப்பூர்வ இணையதளத்தில் குறிப்பிடப்பட்டுள்ள தகவல்கள் சரியானவை என்றும் அவர் உறுதிப்படுத்தினார்.
பிரதி சபாநாயகர் ரிஸ்வி சாலி மற்றும் டில்வின் சில்வா ஆகியோரின் வயதுகள்
பிரதி சபாநாயகர் வைத்தியர் ரிஸ்வி சாலி அவர்களின் பிறந்த திகதி பாராளுமன்ற அதிகாரப்பூர்வ இணையதளத்தில் குறிப்பிடப்படவில்லை. நாம் பரிசோதித்த Wikipedia மற்றும் Manthri.lk பக்கங்களிலும் அவரது பிறந்த திகதி குறிப்பிடப்படவில்லை. 2024 ஆம் ஆண்டு நடைபெற்ற நேர்காணல் ஒன்றில் வைத்தியர் ரிஸ்வி சாலி அவர்கள் தான் 1986 ஆம் ஆண்டிலிருந்து மருத்துவராகப் பணியாற்றியதாகக் குறிப்பிடுகிறார்.
சமூக ஊடக வீடியோவில் குறிப்பிடப்பட்டுள்ளவாறு பிரதி சபாநாயகரின் வயது 77 தானா என்பது குறித்து நாம் மேற்கொண்ட ஆய்வின் போது, இது குறித்து தேசிய மக்கள் சக்தியின் ஊடகப் பிரிவு தெரிவித்ததாவது: குறித்த பதிவில் காணப்படும் வயது சரியானது அல்ல என்றும், பிரதி சபாநாயகர் வைத்தியர் ரிஸ்வி சாலி அவர்கள் 1958 டிசம்பர் 1 ஆம் திகதி பிறந்துள்ளார் என்றும், அதன்படி தற்போது வைத்தியர் ரிஸ்வி சாலி அவர்களின் வயது 67 ஆகும் என்றும் தெரிவித்தனர். அவரது பிறந்த திகதியை உறுதிப்படுத்தும் சுயாதீன எழுத்துப்பூர்வ ஆதாரங்கள் எதுவும் நமக்குக் கிடைக்காததால், இதை கட்சியின் பேச்சாளரின் கூற்றாக மட்டுமே நாம் எடுத்துக்கொள்கின்றோம்.
இதற்கிடையில், மக்கள் விடுதலை முன்னணியின் (JVP) பொதுச்செயலாளர் டில்வின் சில்வா அவர்கள் தற்போதைய பாராளுமன்றத்தைப் பிரதிநிதித்துவப்படுத்தும் ஒரு உறுப்பினர் அல்ல என்பதால், அவரது தகவல்கள் பாராளுமன்ற அதிகாரப்பூர்வ இணையதளத்தில் சேர்க்கப்படவில்லை. அதன்படி, அவரது பிறந்த திகதி மற்றும் வயதை உறுதிப்படுத்த ஏற்றுக்கொள்ளக்கூடிய எழுத்துப்பூர்வ ஆதாரங்களைப் பரிசோதிக்க நாம் நடவடிக்கை எடுத்தோம்.
2025 மார்ச் 20 அன்று வெளியிடப்பட்ட நம்மால் செய்யப்பட்ட உண்மைச் சரிபார்ப்பில், டில்வின் சில்வா அவர்கள் தான் 1956 ஆம் ஆண்டு பிறந்ததாகவும், 1983 கறுப்பு ஜூலையின் போது தனக்கு வயது 27 ஆக இருந்ததாகவும் குறிப்பிட்டிருந்தார். மேலும், Daily Mirror இணையதளத்தில் 2026 பிப்ரவரி 23 அன்று வெளியான கட்டுரை ஒன்றிலும் அவரது பிறந்த திகதி 1956 பிப்ரவரி 26 எனக் குறிப்பிடப்பட்டுள்ளது.
இதற்கிடையில், மக்கள் விடுதலை முன்னணியின் ஊடகப்பிரிவினை நாம் தொடர்புக்கொண்டு வினவியபோது, சமூக ஊடக பதிவில் டில்வின் சில்வா அவர்களின் வயது 77 எனக் குறிப்பிடுவது பொய் என்றும், 1956 ஆம் ஆண்டு பிறந்த அவரது உண்மையான வயது தற்போது 70 ஆகும் என்றும் தெரிவித்தனர். அதன்படி, மேற்குறிப்பிட்ட ஆதாரங்களில் குறிப்பிடப்பட்டுள்ள பிறந்த திகதி தகவல்கள் மற்றும் கட்சியிடமிருந்து பெறப்பட்ட தகவல்களின்படி, குறித்த பதிவில் அவரது வயது தொடர்பாகத் தெரிவிக்கப்பட்டுள்ள கூற்று தவறானவை என கண்டறியப்பட்டது.
நாம் மேற்கொண்ட ஆய்வின் அடிப்படையில் ஆளும் கட்சியின் சில அரசியல் வாதிகளின் வயது என பகிரப்படும் தகவல் தவறானவை என கண்டறியப்பட்டது.
எங்களது சமூகவலைதளபக்கங்களை பின்தொடர….
Facebook Page I Twitter Page I Instagram | Google News Channel |TikTok | Youtube
Conclusion: முடிவு
எனவே வாசகர்களே, இது போன்ற தவறான செய்திகள், புகைப்படங்கள் மற்றும் வீடியோக்களை உறுதிசெய்யாமல் மற்றவர்களுக்குப் பகிரவேண்டாம்.
இவ்வாறான சந்தர்ப்பங்களில், இவற்றின் உண்மைத்தன்மையினை கண்டறிய எமது வாட்ஸ்அப் இலக்கத்திற்கு (+94721414696) தொடர்புகொள்ளுங்கள்.
Title: ஆளும் கட்சியின் சில அரசியல் வாதிகளின் வயது என பகிரப்படும் தகவல் உண்மையா?
Written By: S.G.Prabu
Result: Misleading
