வரலாற்றில் முதல் முறையாக இலங்கையின் வறுமை நிலை 65% ஆக உயர்ந்துள்ளதா?

Subscribe to our WhatsApp Channel

உலக வங்கியின் அறிக்கையின்படி, வரலாற்றில் முதல் முறையாக இலங்கையின் வறுமை நிலை 65% ஆக உயர்ந்துள்ளதாகக் கூறும் பதிவுகள் அண்மையில் சமூக ஊடகங்களில் பகிரப்பட்டு வந்தமையை காணமுடிந்தது.

எனவே இது குறித்த உண்மையை அறிய ஃபேக்ட் கிரஸண்டோ நிறுவனம் ஆய்வொன்றை மேற்கொண்டது.

தகவலின்விவரம் (What is the claim):

Facebook | Archived Link | Facebook | Facebook

Facebook | Archived Link

செப்டம்பர் மாத பணவீக்கம் மாற்றமின்றி 8% ஆக நிலவுகிறது.

உணவுப் பணவீக்கம் 8.7% ஆக அதிகரிப்பு.

உணவுப் பணவீக்கம் (Food Inflation) என்பது சந்தையில் உள்ள உணவுப் பொருட்களின் விலைகள் ஒட்டுமொத்தமாக தொடர்ந்து அதிகரிப்பதாகும்.

இந்த உணவுப் பணவீக்கத்தை அனுபவிக்காதவர் எவரும் இல்லை.

சாதாரண மக்களின் நிலையைச் சற்று யோசித்துப் பாருங்கள்..

உலக வங்கியின் தரவுகளின்படி, இலங்கையின் வறுமை வீதம் 65.4% ஆகும். மேலும், ஒரு நபருக்கு நாளொன்றுக்கு குறைந்தபட்சம் 8.3 அமெரிக்க டொலர்கள், அதாவது சுமார் ரூ. 2,724 தேவைப்படுகிறது.

2724 × 30 = ரூ. 81,720 per month (உணவு,உடை,தங்குமிடம்,சுகாதாரம்,கல்வி மற்றும் பிற அடிப்படைத் தேவைகள் உள்ளடங்கும் )

ஆனால், அரசாங்கத்தினதும் தொகைமதிப்பு மற்றும் புள்ளிவிவரத் திணைக்களத்தினதும் தரவுகளின்படி, ஒரு நபர் 30 நாட்கள் வாழ்வதற்கு ரூ. 17,315 போதுமானது அதாவது ஒரு நாளைக்கு ரூபா 579 எனக் கூறப்பட்டுள்ளது.

61 லட்சம் குடும்பங்களில் 33% குடும்பங்கள் கடுமையான உணவுப் பாதுகாப்பின்மையை எதிர்கொள்கின்றன.

இது தான் சாதாரண மக்களின் இன்றைய வாழ்க்கை நிலை. என தெரிவித்து குறித்த பதிவு கடந்த 2026.09.30 ஆம் திகதி பகிரப்பட்டிருந்தது.

Fact Check (உண்மை அறிவோம்)

இலங்கையின் வறுமை நிலை வரலாற்றில் முதல் முறையாக 65% ஆக உயர்ந்துள்ளதாகக் கூறும் மேற்கண்ட சமூக ஊடகப் பதிவுகளில், அதற்கான ஆதாரமாக உலக வங்கியின் அறிக்கை ஒன்றும் குறிப்பிடப்பட்டிருந்தது. அந்த அறிக்கை உலக வங்கியின் Macro Poverty Outlook (MPO) அறிக்கையாகும்.

மேற்கண்ட அறிக்கை என்ன? அதில் குறிப்பிடப்பட்டுள்ள தகவல்கள் என்ன? என்பதையும், உலக வங்கியின் அதிகாரப்பூர்வ புதுப்பிக்கப்பட்ட அறிக்கைகள், தரவுகள் மற்றும் ஏனைய அதிகாரப்பூர்வ ஆதாரங்களின் அடிப்படையில், இலங்கையின் ஒட்டுமொத்த வறுமை நிலை உண்மையில் 65% ஆக உயர்ந்துள்ளதா என்பதையும் ஆராய்ந்து உண்மைச் சரிபார்ப்பை மேற்கொண்டோம்.

இலங்கையின் வறுமை விகிதம் (உலக வங்கி)

உலக வங்கியின் “Sri Lanka Development Update 2025” அறிக்கையின்படி, நாளொன்றுக்கு 3.65 டாலர் (2017 PPP) வறுமைக் கோட்டில் 2024-இல் இலங்கையின் வறுமை விகிதம் 24.5% என மதிப்பிடப்பட்டது. இது 2019 மட்டத்தைவிட ஏறக்குறைய இருமடங்கு. (2021 PPP அடிப்படையிலான 2026 MPO அறிக்கையில், நாளொன்றுக்கு 4.20 டொலர் என்ற கீழ்-நடுத்தர வருமானக் கோட்டில் 2024-க்கான மதிப்பீடு 25.0% ஆக இருந்தது. இது வேறுபட்ட PPP மதிப்பை அடிப்படையாகக் கொண்ட அதே கருத்தாக்கத்திலான வறுமைக் கோடாகும்.

இலங்கையின் வறுமை வீதம் (தேசிய மட்டத்திலான ஆதாரங்கள்)

மக்கள் தொகை கணக்கெடுப்பு மற்றும் புள்ளிவிபரத் திணைக்களம் (DCS) வெளியிட்ட தரவுகளின்படி, இலங்கையின் 2019ஆம் ஆண்டுக்கான தேசிய வறுமை வீதம் 14.3% ஆகும்.

இந்த மதிப்பு, DCS இறுதியாக அதிகாரப்பூர்வமாக வெளியிட்ட 2019ஆம் ஆண்டுக்கான குடும்ப வருமானம் மற்றும் செலவினங்கள் தொடர்பான ஆய்வு (HIES 2019) தரவுகளின் அடிப்படையில் கணக்கிடப்பட்டுள்ளது.

DCS வெளியிட்டுள்ள வெளியீட்டு கால அட்டவணையின்படி, 2025 HIES தொடர்பான வறுமைக் குறியீடுகள் 2026 ஒக்டோபர் 30 முதல் டிசம்பர் 30 வரையிலான காலப்பகுதியில் வெளியிடப்பட உள்ளன.

மேலும், DCS கணக்கிட்ட 2026 ஜூலை மாதத்திற்கான அதிகாரப்பூர்வ வறுமைக் கோடு, ஒரு நபருக்கு மாதத்திற்கு 17,679 இலங்கை ரூபாய் ஆகும்.

இந்தத் தொகை, ஒருவரின் அடிப்படைத் தேவைகளைப் பூர்த்தி செய்வதற்குத் தேவையான குறைந்தபட்ச செலவைக் குறிக்கும் வறுமைக் கோடு ஆகும். இது வறுமையில் உள்ள மக்களின் சதவீதத்தை (வறுமை வீதத்தை) குறிக்கும் அளவுகோல் அல்ல.

2019 HIES ஆய்வுக்குப் பின்னர் அதிகாரப்பூர்வ வறுமைத் தரவுகள் வெளியிடப்படாத நிலையில், உலக வங்கி வெளியிட்டுள்ள பின்னர் வந்த வறுமை வீதங்கள் அனைத்தும் மதிப்பீடுகளாகும். MPO அறிக்கையில் குறிப்பிடப்பட்டுள்ளபடி, உண்மையான கணக்கெடுப்புத் தரவு 2019ஆம் ஆண்டுக்கு மட்டுமே உள்ளது.

2020 முதல் 2025 வரையிலான வறுமை வீதங்கள், 2019 HIES தரவுகளை அடிப்படையாகக் கொண்ட மதிப்பீடுகளாகும். அதேவேளை, 2026 முதல் 2028 வரையிலான தரவுகள் முன்னறிவிப்புகளாக (Forecast) குறிப்பிடப்பட்டுள்ளன.

65% எங்கிருந்து வந்தது? உலக வங்கியின் 2026 ஏப்ரல் MPO அறிக்கை

உலக வங்கி இலங்கைக்கான MPO அறிக்கையை 2026 ஏப்ரலில் வெளியிட்டது (அதாவது ஜூலையில் இலங்கை உயர்-நடுத்தர வருமான நாடாக வகைப்படுத்தப்படுவதற்கு முன்). சமூக ஊடகப் பதிவுகள் மூலமாகக் குறிப்பிட்டதும் இதே அறிக்கையைத்தான்.

உலக வங்கி 2025 ஜூன் முதல் 2021 விலை மட்டங்களை (2021 PPP) அடிப்படையாகக் கொண்ட புதிய சர்வதேச வறுமைக் கோடுகளைப் பயன்படுத்துகிறது:

• 3.00 டொலர்/நாள்: குறைந்த வருமான நாடுகளின் வழக்கமான தேசிய வறுமைக் கோடு.
• 4.20 டொலர்/நாள்: கீழ்-நடுத்தர வருமான நாடுகளுக்கான கோடு.
• 8.30 டொலர்/நாள்: உயர்-நடுத்தர வருமான நாடுகளின் வழக்கமான வறுமைக் கோடு.

PPP டொலர் என்பது சந்தை மாற்று விகிதத்தில் கணிக்கப்படும் டொலர் அல்ல. நாடுகளுக்கிடையிலான விலை மட்ட வேறுபாட்டைக் கணக்கில் கொள்ளும் அலகு.

ஏப்ரல் 2026 MPO அறிக்கையின்படி, 2023 முதல் 2028 வரை மூன்று கோடுகளிலும் வறுமை மதிப்பீடுகளும் கணிப்புகளும் (e = மதிப்பீடு, f = கணிப்பு):

வறுமைக் கோடு (2021 PPP)	2023e	2024e	2025e	2026f	2027f	2028f
சர்வதேச வறுமை ($3.00/நாள்)	10.8%	9.3%	7.9%	6.9%	6.5%	6.2%
கீழ்-நடுத்தர வருமான வறுமை ($4.20/நாள்)	27.6%	25.0%	22.1%	20.1%	19.5%	18.9%
உயர்-நடுத்தர வருமான வறுமை ($8.30/நாள்)	71.1%	69.3%	66.7%	65.4%	64.5%	63.4%

மூலம்: உலக வங்கி, Sri Lanka Macro Poverty Outlook (ஏப்ரல் 2026).

MPO-வின் முக்கிய கணிப்பு: வறுமை குறையும்

MPO-வின் முதன்மைக் குறிகாட்டி 4.20 டாலர் கோடு. அறிக்கை கூறுகிறது: 2026-இல் வறுமை 20.1% ஆகக் குறையும் என்று கணிக்கப்படுகிறது, ஆனால் குறையும் வேகம் மந்தமாகும் என எதிர்பார்க்கப்படுகிறது.

இலங்கை மீண்டும் உயர் நடுத்தர வருமான நாடாக வகைப்படுத்தப்பட்டது – 2026 ஜூலை

2019ஆம் ஆண்டு ஜூலை மாதத்தில் முதன்முறையாக உயர் நடுத்தர வருமானம் கொண்ட நாடுகள் என்ற பிரிவில் இணைந்த இலங்கை, 2020ஆம் ஆண்டு ஜூலை மாதத்தில் மீண்டும் கீழ் நடுத்தர வருமானம் கொண்ட நாடுகள் என்ற பிரிவிற்கு தரமிறக்கப்பட்டது.

2022ஆம் ஆண்டு ஏற்பட்ட பொருளாதார நெருக்கடியின் பின்னர் ஏற்பட்ட பொருளாதார மீட்சி, 2025ஆம் ஆண்டில் பதிவான 5.0% பொருளாதார வளர்ச்சி மற்றும் தனிநபர் மொத்த தேசிய வருமானம் (GNI) அதிகரித்தமை ஆகியவற்றின் காரணமாக, 2026 ஜூலை 1ஆம் திகதி உலக வங்கியின் வருமான வகைப்பாட்டில் இலங்கை மீண்டும் உயர் நடுத்தர வருமானம் கொண்ட நாடுகளின் பட்டியலில் இணைக்கப்பட்டது. உலக வங்கி வகைப்பாடு தொடர்பான அறிக்கை

உயர்-நடுத்தர வருமான வகைப்பாடும் 8.30 டொலர் கோடும்

உலக வங்கியின் 2026 (FY27) வகைப்பாட்டின்படி, உயர்-நடுத்தர வருமான நாடாக இருக்க Atlas GNI தலா வருமானம் 4,636 முதல் 14,375 டொலர் வரை இருக்க வேண்டும். 2025-க்கான இலங்கையின் மதிப்பு 4,670 டொலர். எல்லையை வெறும் 34 டொலர் வித்தியாசத்தில் கடந்துள்ளது. உலக வங்கியும் இதை “எல்லையை மிகக் குறைவாகக் கடந்த” நிலை எனக் குறிப்பிடுகிறது. World Bank | Archived Link

8.30 டொலர் கோடு அந்த வகையின் வழக்கமான வறுமைக் கோடு. தலா வருமானம் 4,670 டொலர் உள்ள நாட்டுக்கும் 14,375 டொலர் வரை உள்ள நாட்டுக்கும் அது சமமாகப் பொருந்தும். அந்த வகையின் கீழ் எல்லையில் இருக்கும் இலங்கைக்கு இக்கோட்டைப் பயன்படுத்தும்போது அதிக சதவீதம் வருவதை இதன் மூலம் விளக்கலாம். (இது உலக வங்கியின் கூற்று அல்ல; கோட்டையும் வருமான வரம்பையும் ஒப்பிடுவதில் வரும் விளக்கம்.)

அக்டோபர் 2026: உலக வங்கி மதிப்பீடுகளைத் திருத்தியது

2026 அக்டோபரில் வெளியான “Sri Lanka Development Update – FAQ: Updating Sri Lanka’s Poverty Estimates” ஆவணத்தின்படி, உலக வங்கி 2020–2024 காலத்துக்கான வறுமை மதிப்பீடுகளை மேம்படுத்தப்பட்ட முறையில் திருத்தியுள்ளது. 2025-க்கான nowcast, 2026–2028 கணிப்புகளும் அதற்கேற்ப மாற்றப்பட்டன.

மாற்றங்கள் என்ன? பெரிய குடும்பச் செலவு ஆய்வுகளுக்கு இடையிலான காலத்தில் முன்பு தேசிய கணக்குகளைப் பயன்படுத்தி (macro-to-micro) வறுமை மதிப்பிடப்பட்டது. இப்போது தொழிலாளர் படை ஆய்வின் (LFS) உண்மையான குடும்ப வருமானம், வேலைவாய்ப்பு, குடும்பப் பண்புகள் தரவுகளைக் கொண்டு (survey-to-survey imputation) மதிப்பிடப்படுகிறது. சரிபார்ப்புக்கு 2016 மற்றும் 2019 HIES அடிப்படையாகக் கொள்ளப்பட்டன. IFPRI-இன் BRIGHT ஆய்வு (2024/25), WFP-இன் உணவு மற்றும் பயிர் பாதுகாப்பு மதிப்பீடுகள் (2023–2024), உலக வங்கியின் 2024 தொலைபேசிக் குடும்ப ஆய்வு, LirneAsia-வின் 2022 குடும்ப ஆய்வு ஆகியவையும் 2019 முதல் வாழ்க்கைத் தரம் கடுமையாகச் சரிந்தது என்ற அதே போக்கை உறுதிப்படுத்தியதாக ஒக்டோபர் அறிக்கை கூறுகிறது.

4.20 டொலர் கோட்டுக்கான திருத்தப்பட்ட மதிப்பீடுகள் (2021 PPP; * = nowcast/கணிப்பு):

ஆண்டு	2019	2022	2023	2024	2025*	2026*	2027*	2028*
திருத்தப்பட்டது (LFS அடிப்படை)	11.5%	18.4%	20.7%	18.4%	16.9%	15.8%	14.8%	14.0%
முந்தையது (macro-to-micro)	11.5%	23.1%	27.6%	25.0%	22.1%	20.1%	19.5%	18.9%

தேசிய வறுமைக் கோட்டிற்கு அமைய உச்சம் திருத்தப்பட்டது: 2023-க்கு 31.4%-இலிருந்து 24.0%-க்கும், 2024-க்கு 29.0%-இலிருந்து 21.7%-க்கும் மாறியது.

நெருக்கடியின் உச்சத்தில் வறுமை முன்பு மதிப்பிட்டதைவிடக் குறைவு (2023-இல் 27.6%-க்குப் பதிலாக 20.7%). ஆனால் ஒட்டுமொத்தப் படம் மாறவில்லை: வறுமை கிட்டத்தட்ட இருமடங்கானது, பின்னர் பகுதியளவு மீண்டது.

ஆனால் உண்மையில் இங்கு குறிப்பிடப்பட்டிருப்பது நிலத்தில் வறுமை 7 புள்ளிகள் குறைந்துவிட்டது என்பதல்ல. உண்மை நிலை மாறவில்லை, அது இப்போது மேலும் துல்லியமாக அளவிடப்படுகிறது. 2019 அடிப்படை மாறவில்லை.

• திருத்தப்பட்ட தொடர் அதிகாரப்பூர்வ புள்ளிவிவரம் அல்ல. அதிகாரப்பூர்வ அளவுகோல் DCS-இன் HIES. மாதிரி மதிப்பீடுகள் இடைக்காலத்துக்கானவை.
• இவை துல்லியமான புள்ளி மதிப்பீடுகள் அல்ல. போக்கின் வடிவமே முக்கியம்.

8.30 டொலர் கோடு பற்றி ஒக்டோபர் அறிக்கை கூறுவது

3.00, 4.20, 8.30 டொலர் கோடுகள் சேர்ந்து பொருளாதாரம் வளரும்போது வறுமையின் வெவ்வேறு ஆழங்களைக் காட்டுகின்றன. 8.30 டொலர் கோட்டில் “பத்து இலங்கையர்களில் ஆறுக்கு அருகில்” வறுமையில் உள்ளனர் என்று ஒக்டோபர் அறிக்கை கூறுகிறது. இது புதிய வறுமை மதிப்பீடு அல்ல, வேறு அளவுகோல். இலங்கையின் உயர்-நடுத்தர நிலை புதியது என்பதால் இக்கோடு இப்போதைக்கு “இலக்கு அளவுகோல்” (aspirational benchmark). பொருளாதாரம் வளரும்போது, அந்த வளர்ச்சி குடும்பங்களின் வாழ்க்கைத் தரத்தில் முன்னேற்றமாக மாறுகிறதா என்பதைப் பார்க்க இது முக்கியமாகும்.

வறுமை குறைகிறது, ஆனால் நெருக்கடிக்கு முந்தைய நிலையைவிட மிக அதிகம்

முந்தைய MPO கணிப்புப்படி 4.20 டொலர் கோட்டில் ஐந்தில் ஒருவர் வறுமையில் இருப்பார் என்றிருந்தது. திருத்தப்பட்ட மதிப்பீட்டில் 2026 இற்கு15.8%, அதாவது சுமார் ஆறில் ஒருவர். எனினும் வறுமை குறைகிறது என்றாலும் அது இன்னும் உயர்ந்த மட்டத்திலேயே உள்ளது.

ஒக்டோபர் அறிக்கையின் முக்கிய உள்ளடக்கம்

• 2019 முதல் 2023 வரை வறுமை கிட்டத்தட்ட இருமடங்கானது. சுமார் இருபது இலட்சம் பேர் வறுமையில் தள்ளப்பட்டனர்.
• 2025-இல் வறுமை 16.9%, 2026-இல் 15.8%, 2028-இல் 14.0% என மதிப்பிடப்படுகிறது. ஆனால் 2019-இன் 11.5% மட்டத்திற்கு மேலேயே குறைந்தது 2028 வரை நீடிக்கும்.
• உண்மையான தொழிலாளர் வருமானம் 2019–2023 இடையே 40% சதவீதத்திற்கும் மேல் வீழ்ந்தது, இன்னும் முழுமையாக மீளவில்லை.
• தொழிலாளர் படைப் பங்கேற்பு 2019-இல் 52.3% சதவீதத்திலிருந்து 2024-இல் 47.4% சதவீதமாக குறைந்து, 2025-இல் 49.4% சதவீதமாக ஓரளவு உயர்ந்தது. பெண்களுக்கு 34.5% சதவீதத்திலிருந்து 32.4% சதவீதமாக (2024) குறைந்தது.
• ஐந்து வயதுக்குட்பட்ட குழந்தைகளின் வளர்ச்சிக் குறைபாடு 2021-இல் 7.4% சதவீதத்திலிருந்து 2025-இல் 10.1% சதவீமாக உயர்ந்தது.
• 2026-இல் இலங்கையர்களில் ஐந்தில் இருவர் வறுமையில் உள்ளனர் அல்லது வறுமையில் விழும் அபாயத்தில் உள்ளனர்.
• 2026 தொடக்கத்தில் மத்திய கிழக்குப் பிரச்சினையுடன் தொடர்புடைய எரிசக்திச் செலவு உயர்வால் பணவீக்கம் அதிகரித்து, உண்மை வருமானம் தேக்கமடைந்தது.
• மேல் மாகாணத்துக்கு வெளியே வறுமை விகிதம் அதைவிட 2–3 மடங்கு. தோட்டத் துறையில் தேசிய சராசரியின் 3 மடங்கு. ஏழைக் குடும்பங்களுக்கும் அடிப்படைத் தேவைக்கும் இடையிலான இடைவெளி 2019–2024 இடையே தேசிய அளவில் இருமடங்கானது, வடக்கு மாகாணத்தில் மேல் மாகாணத்தைவிட நான்கு மடங்கு அதிகம்.

புதிய மதிப்பீடுகள் முந்தையதைவிட நல்ல செய்தி என்றாலும், நெருக்கடி கடுமையானது, அதன் தாக்கம் இன்னும் நீடிக்கிறது என்பதையே காட்டுகின்றன.

வருமான வகைப்பாடும் வறுமையும் வேறு வேறு அளவீடுகள்

உலக வங்கியின் ஒக்டோபர் அறிக்கை கூறுவது: வருமான வகைப்பாடு என்பது நாட்டின் ஒட்டுமொத்தப் பொருளாதார அளவை மக்கள்தொகையில் சமமாகப் பிரித்துக் காட்டும் தேசியச் சராசரி. வருமானம் எப்படிப் பகிரப்படுகிறது, மீட்சி மிகவும் பாதிக்கப்பட்டவர்களைச் சென்றடைந்ததா என்பதை அது பார்ப்பதில்லை. எனவே இவ்விரண்டையும் ஒரே “மீட்சிக் கதை”யாகப் படிக்கக் கூடாது.

அடுத்த தரவு எப்போது?

• 2025 தொழிலாளர் படை ஆய்வுத் தரவு 2026 நவம்பரில் எதிர்பார்க்கப்படுகிறது (சூறாவளி தித்வாவுக்குப் பிந்தைய முதல் குடும்ப மட்டத் தரவு). அதைக்கொண்டு மதிப்பீடுகள் மீண்டும் புதுப்பிக்கப்படும்.
• 2025 HIES அதிகாரப்பூர்வ தரவு 2027-இல் எதிர்பார்க்கப்படுகிறது என்று உலக வங்கியின் ஒக்டோபர் அறிக்கை குறிப்பிடுகிறது
• தேசிய வறுமைக் கோடு தற்போது 2019 விலைகளில் தலா மாதம் ரூ. 6,966. 2025 HIES தரவு கிடைத்ததும் இது புதுப்பிக்கப்படும்.

பேராசிரியர் வசந்த அத்துகோரள – பொருளியல் கற்கைகள் துறை, பேராதனைப் பல்கலைக்கழகம்

இது தொடர்பாக நாங்கள் மேற்கொண்ட விசாரணையின்போது, இலங்கை உயர் நடுத்தர வருமானம் கொண்ட நாடாக மாறியமை, உயர் மற்றும் கீழ் நடுத்தர வருமானம் கொண்ட நாடுகளின் வறுமையை அளவிடப் பயன்படுத்தப்படும் வறுமைக் கோடுகளுக்கு இடையிலான வேறுபாடு மற்றும் உயர் நடுத்தர வருமானம் கொண்ட நாடாக மாறியவுடன் மக்களின் வருமானம் உடனடியாக அதிகரிக்காது என்பது தொடர்பில் பேராசிரியர் தெரிவித்த கருத்துகள் பின்வருமாறு:

“இலங்கை உயர் நடுத்தர வருமானம் கொண்ட நாடாக மாறியதற்குக் காரணம், ஒருவகையில், கடந்த ஆண்டில் எமது தனிநபர் வருமானம் குறிப்பிட்ட வரம்பை விட உயர்ந்த மட்டத்தை அடைந்திருந்தமையாகும். உயர் நடுத்தர வருமானம் கொண்ட நாடுகளிலும், கீழ் நடுத்தர வருமானம் கொண்ட நாடுகளிலும் வறுமையை கணக்கிடும் முறைகள் ஒன்றுக்கொன்று வேறுபட்டவை. பொதுவாக, ஒரு நபர் நாளொன்றுக்கு எவ்வளவு வருமானம் பெறுகிறார் என்பது போன்ற அளவுகோல்களை அடிப்படையாகக் கொண்டே இந்தக் கணக்கீடுகள் மேற்கொள்ளப்படுகின்றன. எனவே, உலக வங்கி கணக்கிட்டுள்ள தரவுகள் பெரும்பாலும் இரண்டாம் நிலைத் தரவுகளை அடிப்படையாகக் கொண்டவை.

இலங்கையின் வறுமை பொதுவாக சுமார் 21.5% என்ற மட்டத்தில் காணப்படுகிறது. இந்த 21.5% என்ற மட்டத்தில், நாம் உயர் நடுத்தர வருமானம் கொண்ட நாடாக மாறிய பின்னர் உடனடியாக எந்தவொரு மாற்றமும் ஏற்படாது. ஏனெனில், வறுமையை அளவிடுவதற்கும், ஒரு நாடு உயர் அல்லது கீழ் நடுத்தர வருமானம் கொண்ட நாடா என்பதைத் தீர்மானிப்பதற்கும் பயன்படுத்தப்படும் அளவுகோல்கள் ஒன்றுக்கொன்று வேறுபட்டவை.

ஒரு நாட்டில் வறுமை குறைய வேண்டுமெனில், நீண்ட காலப்பகுதியில் பொருளாதாரத்தில் மாற்றங்கள் ஏற்பட வேண்டும். அது உடனடியாக ஒரு அல்லது இரண்டு ஆண்டுகளில் பெருமளவில் மேலும் கீழுமாக மாறிவிடும் விடயமல்ல. எமது பெயரளவிலான மொத்த உள்நாட்டு உற்பத்தி (Nominal GDP) அதிகரித்ததன் காரணமாக, தனிநபர் வருமானமும் அதிகரித்து, நாம் உயர் நடுத்தர வருமானம் கொண்ட நாடாக மாறியுள்ளோம்.

உயர் நடுத்தர வருமானம் கொண்ட நாடுகளிலும், கீழ் நடுத்தர வருமானம் கொண்ட நாடுகளிலும் வறுமையை அளவிடும்போது பயன்படுத்தப்படும் ஒரு நபருக்கான நாளாந்த வருமான (USD) வரம்புகளில் குறிப்பிடத்தக்க வேறுபாடு உள்ளது. எனினும், ஒரு நாடு உயர் நடுத்தர வருமானம் கொண்ட நாடாக மாறியவுடன், மக்களின் தனிநபர் வருமானம் உடனடியாக அதிகரிக்காது. அதற்குக் காலம் தேவைப்படும்.”

பேராசிரியர் குறிப்பிடும் 21.5% என்பது தோராயமான மதிப்பாகும். உலக வங்கியின் MPO அறிக்கையின் கீழ் நடுத்தர வருமான நாடுகளுக்கான வறுமைக் கோட்டின் அடிப்படையில், இலங்கையின் வறுமை வீதம் 2025ஆம் ஆண்டில் 22.1% ஆகவும், 2026ஆம் ஆண்டில் 20.1% ஆகவும் முன்னறிவிக்கப்பட்டுள்ளது.

மேலும், உலக வங்கியின் இந்த மதிப்புகள் இரண்டாம் நிலைத் தரவுகள் எனக் குறிப்பிடப்படுவதைக் காட்டிலும், 2019 HIES தரவுகளை அடிப்படையாகக் கொண்ட மதிப்பீடுகள் மற்றும் முன்னறிவிப்புகள் (Forecast) எனப் புரிந்துகொள்வது பொருத்தமானதாகும்.

எங்களது சமூகவலைதளபக்கங்களை பின்தொடர….

Facebook Page I Twitter Page I Instagram | Google News Channel |TikTok | Youtube

Conclusion: முடிவு

வரலாற்றில் முதல் முறையாக இலங்கையின் வறுமை வீதம் 65% ஆக உயர்ந்துள்ளது” என சமூக ஊடகங்களில் பகிரப்படும் பதிவுகள் தவறாக வழிநடத்தக்கூடியவை என்பது தெரியவந்துள்ளது.

உலக வங்கியின் 2026 ஏப்ரல் மாத Macro Poverty Outlook (MPO) அறிக்கையில் 65.4% என்ற வறுமை வீதம் குறிப்பிடப்பட்டுள்ளது. எனினும், இது உயர் நடுத்தர வருமானம் கொண்ட நாடுகளுக்கான நாளொன்றுக்கு 8.30 அமெரிக்க டொலர் (2021 PPP) வறுமைக் கோட்டின் அடிப்படையில் 2026ஆம் ஆண்டுக்காக செய்யப்பட்ட முன்னறிவிப்பாகும் (Forecast). அதே வறுமைக் கோட்டின் அடிப்படையில், 2023ஆம் ஆண்டில் 71.1%, 2024ஆம் ஆண்டில் 69.3% மற்றும் 2025ஆம் ஆண்டில் 66.7% என வறுமை வீதம் மதிப்பிடப்பட்டுள்ளது. எனவே, 65.4% என்பது முதல் முறையாக பதிவாகியுள்ள மதிப்போ அல்லது இதுவரை பதிவான அதிகபட்ச மதிப்போ அல்ல.

உலக வங்கியின் முதன்மைக் கீழ்-நடுத்தரக் கோட்டின்படி (4.20 டொலர்), 2026 அக்டோபரில் திருத்தப்பட்ட மதிப்பீட்டில் வறுமை 2023 இல் 20.7% உச்சத்தை எட்டி, 2024-இல் 18.4%, 2025-இல் 16.9% என இறங்கி, 2028-இல் 14.0% ஆகும் எனக் கணிக்கப்படுகிறது

இலங்கை உயர் நடுத்தர வருமான நாடுகளின் பிரிவில் மீண்டும் இணைக்கப்பட்டபோது, அதன் தனிநபர் மொத்த தேசிய வருமானம் (GNI) 4,670 அமெரிக்க டொலராக இருந்தது. இது அந்த வருமானப் பிரிவுக்கான 4,636 அமெரிக்க டொலர் வரம்பை விட சுமார் 34 அமெரிக்க டொலர் மட்டுமே அதிகமாகும். இந்நிலையில், உயர் நடுத்தர வருமான நாடுகளுக்கான பொதுவான வறுமைக் கோடாக நாளொன்றுக்கு 8.30 அமெரிக்க டொலர் என்ற அளவுகோல் பயன்படுத்தப்படுவதால், அதனடிப்படையில் வறுமை வீதம் அதிகமாகத் தோன்றுவதற்கான காரணத்தை இதன் மூலம் புரிந்துகொள்ள முடியும்.

எவ்வாறாயினும், இலங்கையில் வறுமை இன்னும் குறிப்பிடத்தக்க அளவில் காணப்படுகிறது. இலங்கைக்கான இறுதி அதிகாரப்பூர்வ தேசிய வறுமை வீதம் 2019ஆம் ஆண்டில் 14.3% ஆகப் பதிவாகியுள்ளது. 2025ஆம் ஆண்டுக்கான குடும்ப வருமானம் மற்றும் செலவினங்கள் தொடர்பான ஆய்வு (HIES) அடிப்படையிலான வறுமைக் குறியீடுகள், மக்கள் தொகை கணக்கெடுப்பு மற்றும் புள்ளிவிபரத் திணைக்களத்தின் (DCS) வெளியீட்டு கால அட்டவணையின்படி, 2026ஆம் ஆண்டின் இறுதிக்குள் வெளியிடப்பட உள்ளன.

எனவே, உலக வங்கியின் Macro Poverty Outlook அறிக்கை, உலக வங்கியின் வருமான வகைப்பாட்டுத் தரவுகள் மற்றும் DCS தரவுகள் ஆகியவற்றின் அடிப்படையில், சமூக ஊடகங்களில் பரவும் “இலங்கையின் வறுமை வீதம் வரலாற்றில் முதல் முறையாக 65% ஆக உயர்ந்துள்ளது” என்ற கூற்று தவறாக வழிநடத்தக்கூடியது என்பது தெளிவாகின்றது.

இவ்வாறான சந்தர்ப்பங்களில், இவற்றின் உண்மைத்தன்மையினை கண்டறிய எமது வாட்ஸ்அப் இலக்கத்திற்கு (+94721414696) தொடர்புகொள்ளுங்கள்.