දිනපතා සත්‍ය කරුණු දැන ගැනීමට අපගේ WhatsApp චැනලයට මෙතනින් එකතුවන්න.
“ආණ්ඩුක්‍රම ව්‍යවස්ථා ප්‍රතිසංස්කරණය පිළිබඳ මහජන අදහස් විමසීමේ කමිටු වාර්තාව” නම් ලේඛනයක පිටු කිහිපයක් දක්වමින් සමාජ මාධ්‍ය සටහන් කිහිපයක්ම පසුගිය දින කිහිපයේ සංසරණය වී තිබුණා. අදාළ ලේඛනය කුමක්ද, එහි අන්තර්ගත වන්නේ මොනවාද සහ වත්මන් රජය 2026 දී සැබවින්ම ව්‍යවස්ථාවට සිදු කළ සංශෝධනය කුමක්ද යන්න පරීක්ෂා කරමින් අප විසින් සිදු කළ කරුණු පරීක්ෂාව පහතින්.
සමාජ මාධ්‍ය සටහන් (Social Media Posts) :
ඉහත සමාජ මාධ්‍ය සටහන් ඔස්සේ ඉදිරිපත් කර තිබෙන ලේඛනයෙහි නිර්දේශ යටතේ ඉදිරිපත් කර තිබෙන ඇතැම් කරුණු සහ එම ආණ්ඩුක්‍රම ව්‍යවස්ථා ප්‍රතිසංස්කරණය පිළිබඳ මහජන අදහස් විමසීමේ කමිටුවේ විශේෂඥයකු ලෙස වත්මන් අගමැතිනී හරිනි අමරසූරියගේ නම සඳහන් වීම සමාජ මාධ්‍ය සටහන් ඔස්සේ ඉස්මතු කර තිබේ.
අදාළ සටහනෙහි විශේෂයෙන්ම ඉස්මතු කර ඇත්තේ:
3.1.2 ජාතික ධජය: “අනාගමික රාජ්‍යයකට සුදුසු නව ජාතික ධජයක් නිර්මාණය කිරීම”
4.2 ආගම: “ශ්‍රී ලංකාව අනාගමික රාජ්‍යයක් විය යුතුය” යන නිර්දේශයන් වන අතර
එම නිර්දේශ යටතේ වත්මන් අගමැති හරිනි අමරසූරිය මහත්මියගේ නමද ඉස්මතු කර ඇත.
අදාළ වාර්තාවම දක්වමින් පළ කර ඇති පහත සටහන පළ කර ඇත්තේ එම ලේඛනය වත්මන් රජය විසින් ක්‍රියාත්මක කිරීමට නියමිත ප්‍රතිසංස්කරණ බව හඟවමිනි.
Fact Check (කරුණු විමර්ශනය කිරීම) :
ඉහත සමාජ මාධ්‍ය සටහන්වල දක්වා ඇති ආකාරයට 2026 වසරේදී එනම් මෑතකදී එහි දැක්වෙන ආකාරයේ ආණ්ඩුක්‍රම ව්‍යවස්ථා ප්‍රතිසංස්කරණයක් පිළිබඳ මහජන අදහස් විමසීමක් හෝ ඒ සම්බන්ධ කමිටු නිර්දේශයක් ඉදිරිපත් වී ඇත්ද යන්න අප විසින් පරීක්ෂා කළ අතර එහිදී පාර්ලිමේන්තු පුවත් සහ ප්‍රධාන ප්‍රවෘත්ති මාධ්‍ය වාර්තා අතරින් එවැන්නක් සම්බන්ධයෙන් කිසිදු නිල මූලාශ්‍රයක් ඔස්සේ වාර්තා වී නොමැති බව පැහැදිලි විය.
“අනාගමික රාජ්‍යයක් කිරීම” හෝ “නව ධජයක් නිර්මාණය කිරීම” පිළිබඳ නිර්දේශයක් හෝ යෝජනාවක් 2026 දී රජය ඉදිරිපත් කළ බවට වාර්තාවක් අපට දැකගන්නට ලැබුනේ නැහැ. එසේම 2026 ජූලි 21 දින කැබිනට් ප්‍රකාශකවරයා පැවසුවේ නව ව්‍යවස්ථාවක් ගෙන ඒම පිළිබඳව රජය තවමත් තීරණයක් ගෙන නොමැති බවයි. මෙතනින්.
ශ්‍රී ලංකාවේ වර්තමානයේ ක්‍රියාත්මක වන්නේ 1978 ආණ්ඩුක්‍රම ව්‍යවස්ථාව වන අතර, 2026 සැප්තැම්බර් 25 දින සම්මත වූ 22 වන සංශෝධනය ද ඇතුළුව එය 22 වතාවක් සංශෝධනය වී ඇත. මෙතනින්
ආගම පිළිබඳව වත්මන් ව්‍යවස්ථාවේ සඳහන් වන්නේ කුමක්ද?
වත්මන් 1978 ආණ්ඩුක්‍රම ව්‍යවස්ථාවේ II වන පරිච්ඡේදයේ 9 වන වගන්තිය මඟින් බුද්ධාගමට ප්‍රමුඛස්ථානය ලබා දී ඇත. එහි පැහැදිලිවම සඳහන් වන්නේ:
“ශ්‍රී ලංකා ජනරජයේ බුද්ධාගමට ප්‍රමුඛස්ථානය පිරිනමන්නේය. ඒ අනුව 10 වන වගන්තියෙන් සහ 14 වන වගන්තියේ (1) වන උපවගන්තියේ (ඉ) ඡේදයෙන් සියලු ආගම්වලට පිරිනමා ඇති අයිතිවාසිකම් ආරක්ෂා කර දෙන අතරම බුද්ධ ශාසනය සුරක්ෂිත කොට පෝෂණය කිරීම රජයේ වගකීම විය යුත්තේය.” යනුවෙනි.
එබැවින් ව්‍යවස්ථාපිතව ශ්‍රී ලංකාව “අනාගමික රාජ්‍යයක්” නොවේ.
ජාතික ධජය පිළිබඳව ව්‍යවස්ථාවේ සඳහන් වන්නේ කුමක්ද?
වත්මන් ව්‍යවස්ථාවේ I වන පරිච්ඡේදයේ 6 වන වගන්තිය මඟින් ශ්‍රී ලංකා ජනරජයේ ජාතික ධජය නිල වශයෙන් ප්‍රකාශයට පත් කර ඇත. ධජයේ ස්වරූපය ව්‍යවස්ථාවේ II වන උපලේඛනයේ චිත්‍ර සටහනක් මඟින් නිශ්චිතවම දක්වා ඇත.
එසේම ව්‍යවස්ථාවේ 6 වන වගන්තිය හෝ 9 වන වගන්තිය වෙනස් කිරීමට නම්, පාර්ලිමේන්තුවේ තුනෙන් දෙකක බහුතරයකින් පමණක් ප්‍රමාණවත් නොවන අතර, ජනමත විචාරණයකින් ජනතාව සෘජුවම කැමැත්ත ප්‍රකාශ කළ යුතුම වේ (83 වන වගන්තිය අනුව).
මේ දක්වා කිසිදු ව්‍යවස්ථා සංශෝධනයකින්ද බුද්ධාගමට ඇති ස්ථානය (9 වන වගන්තිය) හෝ ජාතික ධජය (6 වන වගන්තිය) පිළිබඳව කිසිදු වෙනසක් සිදු කර නොමැත. ඒවා 1978 වසරේ පැවති ආකාරයෙන්ම අදටත් නොවෙනස්ව පවතී. වත්මන් ආණ්ඩුක්‍රම ව්‍යවස්ථාව ඉංග්‍රීසියෙන් මෙතනින් , සිංහලෙන් මෙතනින්.
මෑතක දී රජය සම්මත කර ගත්තේ විනිසුරුවරුන්ගේ විශ්‍රාම වයස දීර්ඝ කරන 22 වන සංශෝධනයයි
වත්මන් රජය 2026 දී සැබවින්ම ව්‍යවස්ථාවට සිදු කළ වෙනස එය පමණි. එය නව ව්‍යවස්ථාවක් නොව, පවතින 1978 ව්‍යවස්ථාවේ විනිසුරුවරුන්ට අදාළ වගන්ති සංශෝධනය කරන සංශෝධනයකි.
- 22 වන සංශෝධන කෙටුම්පත 2026 අගෝස්තු 7 දින ගැසට් කෙරිණි. මෙතනින් අගෝස්තු 18 දින එය පාර්ලිමේන්තුවට ඉදිරිපත් කර, අධිකරණ අමාත්‍ය හර්ෂණ නානායක්කාර මහතා පළමු වර කියවීම සිදු කළේය. මෙතනින්
- ප්‍රධාන වෙනස්කම්: ශ්‍රේෂ්ඨාධිකරණ විනිසුරුවරුන්ගේ විශ්‍රාම වයස 65 සිට 67 දක්වා ද, අභියාචනාධිකරණ විනිසුරුවරුන්ගේ 63 සිට 65 දක්වා ද වැඩි කිරීම; අභියාචනාධිකරණ විනිසුරුවරුන් සංඛ්‍යාව 19 සිට 24 දක්වා වැඩි කිරීම; ප්‍රධාන විනිසුරුගේ සේවා කාලය වසර හයකට හෝ වයස 67ට සීමා කිරීම. මෙතනින්
- ඊට සමගාමීව ඉදිරිපත් වූ අධිකරණ (සංශෝධන) පනතෙන් මහාධිකරණ විනිසුරුවරුන්ගේ විශ්‍රාම වයස 61 සිට 63 දක්වා ද, දිසා විනිසුරුවරුන්ගේ සහ මහේස්ත්‍රාත්වරුන්ගේ 60 සිට 62 දක්වා ද වැඩි වේ. මූලාශ්‍ර අතර වෙනස්කම් ඇත; පනතේ අවසාන පාඨය සමඟ තහවුරු කරන්න
- පෙත්සම් 67ක් (අධිකරණ වාර්තා අනුව) විභාග කළ ශ්‍රේෂ්ඨාධිකරණ විනිසුරු මඩුල්ල, සංශෝධනයට ජනමත විචාරණයක් අවශ්‍ය නොවන බවත්, පාර්ලිමේන්තුවේ විශේෂ බහුතරයකින් සම්මත කළ හැකි බවත් තීරණය කළේය. කථානායක ජගත් වික්‍රමරත්න මහතා එය 2026 සැප්තැම්බර් 22 දින පාර්ලිමේන්තුවට දැන්වීය. මෙතනින් මෙතනින්
- සැප්තැම්බර් 25 දින සංශෝධනය පක්ෂව 158ක්, විරුද්ධව 63ක් ඡන්ද ලබා සම්මත විය. කථානායකවරයා සහතිකය අත්සන් කිරීමත් සමඟ එය ක්‍රියාත්මක වී තිබේ. මෙතනින්
නව ව්‍යවස්ථාවක් සම්බන්ධයෙන් රජය තවමත් තීරණයක් ගෙන නැත
- 2026 ජූලි 21: කැබිනට් ප්‍රකාශක අමාත්‍ය නලින්ද ජයතිස්ස, රජය බලයට පැමිණ වසර දෙකකට ආසන්න වුවද නව ව්‍යවස්ථාවක් ගෙන ඒම පිළිබඳව තවමත් තීරණයක් ගෙන නොමැති බව පැවසීය. මෙතනින්
- 2026 අගෝස්තු 3: ජනාධිපති අනුර කුමාර දිසානායක, විධායක ජනාධිපති ධුරය අහෝසි කිරීමට කැපවී සිටින බවත්, හදිසියේ සකස් කළ සංශෝධනයකට වඩා පළමුව ජාතික එකඟතාවක් ගොඩනැගීම ප්‍රමුඛතාව බවත් දෙමළ සහ මුස්ලිම් පක්ෂ සන්ධානයකට පැවසීය. මෙතනින්
- 2026 පෙබරවාරි: අධිකරණ අමාත්‍යවරයා, ව්‍යවස්ථා කෙටුම්පත් කමිටුවක් පත් කර නොමැති බවත්, කාල සටහනක් නොමැති බවත් පැවසූ බව වාර්තා විය. මෙතනින්
ඉදිරියේ රජයේ ස්ථාවරය වෙනස් වුවහොත් අපි මෙම ලිපිය යාවත්කාලීන කරන්නෙමු.
සමාජ මාධ්‍ය ඔස්සේ හුවමාරු වන ලේඛනය මෑතකාලීන එකක් නොවේ; වසර 10ක් පැරණි ලේඛනයකි
ඉහත සමාජ මාධ්‍ය සටහන් ඔස්සේ ඉදිරිපත් කර තිබෙන වාර්තාව ශ්‍රී ලංකාවේ නව ආණ්ඩුක්‍රම ව්‍යවස්ථාවක් සකස් කිරීම සඳහා 2016 වසරේදී මහජනතාවගෙන් අදහස් සහ යෝජනා ලබාගෙන සකස් කරන ලද “ආණ්ඩුක්‍රම ව්‍යවස්ථා ප්‍රතිසංස්කරණය පිළිබඳ මහජන අදහස් විමසීමේ කමිටු වාර්තාව” ඇතුළත් ලේඛනයයි. මෙම වාර්තාවේ සම්පූර්ණ සිංහල පිටපත මෙතනින්. ඉංග්‍රීසි පිටපත මෙතනින්.
ශ්‍රී ලංකාවට නව ආණ්ඩුක්‍රම ව්‍යවස්ථාවක් හඳුන්වා දීමේ අරමුණින් 2015 නොවැම්බර් 18 දින පැවැති අමාත්‍ය මණ්ඩල රැස්වීමේදී කැබිනට් අනුකමිටුවක් පත් කර තිබේ. එහි තීරණය මත මහජන අදහස් ලබාගැනීම සඳහා විශේෂ කමිටුවක් පත් කිරීමට තීරණය වී ඇත. මෙතනින් වාර්තාවට අනුව එම කමිටුව අමාත්‍ය මණ්ඩලය විසින් 2015 දෙසැම්බර් 22 දින පත් කරන ලද, ලාල් විජේනායක මහතා සභාපති වූ, සාමාජිකයන් 20 දෙනෙකුගෙන් යුත් කමිටුවකි. (අමාත්‍ය මණ්ඩල මාධ්‍ය නිවේදනයේ සඳහන් වූයේ සාමාජිකයන් 24 දෙනෙකු බවයි.) මෙතනින් වත්මන් අගමැති හරිනි අමරසූරිය 2016 දී මෙම කමිටුවේ සාමාජිකාවක ලෙස කටයුතු කර ඇති අතර, ඒ විශ්ව විද්‍යාල ආචාර්‍යවරියක ලෙසයි. මෙතනින් මෙම කමිටුවේ විද්වතුන් සහ නීතිඥයන් මෙන්ම දේශපාලන පක්ෂ නාමිකයන් ද සිටි බව 2016 විශ්ලේෂණයක සඳහන් වේ. මෙතනින්
කමිටුව විසින් ක්‍රමවේද කිහිපයක් ඔස්සේ මහජන මතය ලබා ගෙන තිබේ. මෙම කමිටුව කණ්ඩායම් කිහිපයකට බෙදී දිවයිනේ සියලුම දිස්ත්‍රික්ක ආවරණය වන පරිදි සංචාරය කරමින්, ප්‍රාදේශීය ලේකම් කාර්යාල සහ දිස්ත්‍රික් කාර්යාලවලදී මහජනතාව හමුවී වාචික සාක්ෂි සටහන් කරගෙන ඇත. මෙතනින් වාර්තාව 2016 මැයි 10 දිනැතිව සකස් කර ඇත. එහි ඇත්තේ ලැබුණු මහජන අදහස් සහ ඒ පිළිබඳ කමිටුවේ නිර්දේශ ය.
2016 වාර්තාවේ සඳහන් වන්නේ තනි නිර්දේශයක් නොව විකල්ප නිර්දේශයි
වාර්තාව ඉදිරිපත් කිරීමේදී ඇතැම් සංවේදී හෝ විවිධ මත පැවැති කරුණු සම්බන්ධයෙන් (උදාහරණයකට: ආගම, රාජ්‍යයේ ස්වභාවය) කමිටුව එකඟතාවකට පැමිණීමට නොහැකි වූ විට, තනි නිර්දේශයක් පමණක් නොදී, කමිටු සාමාජිකයන් ඉදිරිපත් කළ සියලු විකල්ප අදහස් ආණ්ඩුක්‍රම ව්‍යවස්ථා සම්පාදක මණ්ඩලයේ සැලකිල්ලට ගැනීම සඳහා විකල්ප නිර්දේශ ලෙස වාර්තාවට ඇතුළත් කර තිබේ.
4 වැනි පරිච්ඡේදයේ (“ආගම”) 4.2 කොටස යටතේ විකල්ප හයක් ඇත. ඉන් IV වැනි විකල්පය වන “ශ්‍රී ලංකාව අනාගමික රාජ්‍යයක් විය යුතුය” යන්න හරිනි අමරසූරිය ඇතුළු සාමාජිකයන් පස් දෙනෙකු ඉදිරිපත් කළ ඒවා ලෙස පාදසටහන්වල දක්වා ඇත. V වැනි විකල්පය (ආගමේ භූමිකාව පිළිගනිමින් අනාගමික රාජ්‍යයක්) ඉංග්‍රීසි පිටපතේ දැක්වෙන්නේ තවත් සාමාජිකයකු විසින් ඉදිරිපත් කළ ඒවා ලෙසයි. මෙතනින් සිංහල පිටපතේ V වැනි විකල්පයේ පාඨය සමඟ සසඳන්න
එම කොටසේම අනෙක් විකල්ප නිර්දේශ ලෙස වත්මන් 9 වැනි වගන්තිය වෙනස් නොකර තබා ගැනීම, ශීර්ෂය පමණක් “ආගම්” ලෙස වෙනස් කිරීම, සහ සියලු ආගම්වලට සම තත්ත්වය දෙමින් බුද්ධාගම හා බුද්ධ ශාසනය පෝෂණය කිරීම වැනි විවිධ අදහස් ද දක්වා ඇත.
වාර්තාවේ 3 වැනි පරිච්ඡේදයේ (3.1 කොටස) ජාතික ධජය සම්බන්ධයෙන්ද විකල්ප නිර්දේශ තුනක් ඉදිරිපත් කර ඇත:
- අනාගමික රාජ්‍යයකට සුදුසු නව ජාතික ධජයක් නිර්මාණය කිරීම: හරිනි අමරසූරිය ඇතුළු සාමාජිකයන් හය දෙනෙකු ඉදිරිපත් කළ ඒවා ලෙස පාදසටහන්වල දක්වා ඇත.
- සියලු ජනවර්ගවල සමානත්වය හා සමගිය සංකේතවත් වන නව ධජයක් සැලසුම් කිරීම
- වත්මන් ජාතික ධජය එලෙසින්ම පවත්වාගෙන යාම (සාමාජිකයන් 11 දෙනෙකු)
එබැවින්, 2016 දී හරිනි අමරසූරිය මෙම විකල්ප දෙකම ඉදිරිපත් කළ සාමාජිකයන් අතර සිටි බව සමාජ මාධ්‍ය සටහන්වල සඳහන් කරුණ සත්‍යයකි. එහෙත් එය 2016 වාර්තාවක පාදසටහනකි. එය වත්මන් රජයේ ප්‍රතිපත්තියක් බවට සාක්ෂියක් නොවේ.
මෙම නිර්දේශ සඳහා පසුබිම් වී ඇත්තේ මහජන අදහස් වේ. මහජන අදහස් විමසීමේ කමිටු වාර්තාවක් යනු සමාජයේ විවිධ මත දැරූ ජනතාවගේ අදහස් ලේඛනගත කළ වාර්තාවක් මිස, වත්මන් රජයේ තීරණයක් නොවේ. වාර්තාවේ නිර්දේශ කමිටුවේ සමූහ තීරණයක් නොව, සාමාජිකයන් වෙන් වෙන්ව ඉදිරිපත් කළ විකල්ප වේ. මෙහි සෑම පරිච්ඡේදයක්ම ආරම්භ වන්නේ යම් තේමාවක් යටතේ මහජනතාව සහ සංවිධාන ඉදිරිපත් කළ විවිධ මත, අදහස් සහ තර්ක විග්‍රහ කිරීමෙනි.
2016 නිර්දේශ ක්‍රියාත්මක වී නැත
මෙම ක්‍රියාවලිය ඔස්සේ නව ආණ්ඩුක්‍රම ව්‍යවස්ථාවක් නිර්මාණය කර සම්මත කර ගැනීමට එවකට පැවැති රජයට හැකි වූයේ නැත. එමෙන්ම, මෙම කමිටුව ලබා දුන් මහජන නිර්දේශ ද නිල වශයෙන් ක්‍රියාත්මක වීමට නොහැකි විය. 2020 සැප්තැම්බරයේ එවකට රජය නව ව්‍යවස්ථා කෙටුම්පතක් සකස් කිරීමට වෙනම විශේෂඥ කමිටුවක් පත් කළේය. මෙතනින් වර්තමානයේ ද ක්‍රියාත්මක වන්නේ 1978 දී හඳුන්වා දී වරින් වර සංශෝධනය කරන ලද ආණ්ඩුක්‍රම ව්‍යවස්ථාවමය.
ඒ අනුව මෙම කමිටු වාර්තාව මෑතකාලීන එකක් ලෙස හෝ එහි ඇතුළත් නිර්දේශ ඉදිරියේදී ක්‍රියාත්මක වීමට නියමිත ඒවා ලෙස දැක්වීම නොමග යවන සුළු වේ. අදාළ නිර්දේශ 2016 වසරේ දී නව ව්‍යවස්ථා කෙටුම්පත සෑදීමට පෙර රටේ ජනතාව බලාපොරොත්තුවන ව්‍යවස්ථාමය වෙනස්කම් මොනවාද යන්න සොයාබලමින් ඒ මොහොතේ මහජන මතය විමසමින් ඒ මත ලබා දී ඇති නිර්දේශ වේ.
අග්‍රාමාත්‍ය හරිනි අමරසූරියගේ කාර්‍යාලයේ ප්‍රතිචාරය
මේ සම්බන්ධයෙන් වැඩිදුරටත් කරුණු පැහැදිලි කර ගැනීම සඳහා අප විසින් අග්‍රාමාත්‍ය හරිනි අමරසූරියගේ මාධ්‍ය ලේකම්වරිය සම්බන්ධ කරගත් අතර, ඇය අග්‍රාමාත්‍යවරියගෙන් මේ සම්බන්ධයෙන් විමසා තහවුරු කරගැනීමෙන් අනතුරුව අප වෙත අදහස් දක්වමින් පැවසුවේ, 2016 වසරේදී විශ්ව විද්‍යාල ආචාර්‍යවරියක් සහ සිවිල් සමාජ ක්‍රියාකාරිනියක් ලෙස මෙම මහජන අදහස් විමසීමේ කමිටුවට ඇය සම්බන්ධ වූ බවත්, එහිදී ඉදිරිපත් කර තිබෙන නිර්දේශ 2016 වසරේ ඉදිරිපත් වූ මහජන අදහස් මත පදනම්ව ඉදිරිපත් කරන ලද ඒවා බවත්ය.
එය වත්මන් රජයේ අරමුණක් ලෙස හෝ වත්මන් අග්‍රාමාත්‍යවරියගේ පෞද්ගලික අදහසක් ලෙස දැක්වීම සිදු නොකළ යුතු බව අග්‍රාමාත්‍යවරිය සඳහන් කළ බව ද ඇය පැවසුවාය. වර්තමානයේ රජය විසින් මෙවැනි නිර්දේශයක් ක්‍රියාත්මක කිරීමේ සූදානමක් හෝ අරමුණක් නොමැති බවත්, එය 2016 වසරේ මහජන අදහස්වල පිළිබිඹුවක් පමණක් බවත් ඇය තහවුරු කළාය.
Also Read : ජාතික කොඩියේ සිංහයා ඉවත් කිරීමට රජය සැරසෙනවා ද?
අපගේ කරුණු විමර්ශන පිළිබඳ තොරතුරු දැන ගැනීමට එක්වන්න
Facebook | Twitter | Instagram | Google News | TikTok
Conclusion (අවසාන නිගමනය) :
අපගේ කරුණු විමර්ශනයෙන් පෙන්වා දෙන පරිදි ඉහත සමාජ මාධ්‍ය සටහන්වලට පදනම් වී තිබෙන ලේඛනය 2016 ආණ්ඩුක්‍රම ව්‍යවස්ථා ප්‍රතිසංස්කරණ පිළිබඳ මහජන අදහස් විමසීමේ කමිටු වාර්තාව (PRC Report) යි. මෙය 2015 දෙසැම්බර් 22 දින අමාත්‍ය මණ්ඩලය විසින් පත් කරන ලද, සාමාජිකයන් 20 දෙනෙකුගෙන් සමන්විත කමිටුවක් මගින් සකස් කරන ලද ලේඛනයකි. එවකට විශ්ව විද්‍යාල ආචාර්‍යවරියක ලෙස වත්මන් අගමැති හරිනි අමරසූරිය මෙම කමිටුවේ සාමාජිකාවක වූ අතර, 2016 මැයි මාසයේදී වාර්තාව සම්පූර්ණ කරන ලදී. අනාගමික රාජ්‍යයක් සහ නව ධජයක් පිළිබඳ විකල්ප නිර්දේශ ඉදිරිපත් කළ සාමාජිකයන් අතර ඇය සිටි බව වාර්තාවේ පාද සටහන්වලින් පැහැදිලි වේ. කෙසේ නමුත් මෙම වාර්තාවේ දැක්වෙන නිර්දේශ ක්‍රියාත්මක කර නොමැත.
2026 දී වත්මන් රජය ව්‍යවස්ථාවට සිදු කළ සංශෝධනය වන්නේ 2026 සැප්තැම්බර් 25 දින සම්මත වූ, විනිසුරුවරුන්ගේ විශ්‍රාම වයස දීර්ඝ කරන 22 වන සංශෝධනයයි. නව ව්‍යවස්ථාවක් ගෙන ඒම පිළිබඳව රජය තවමත් තීරණයක් ගෙන නොමැත. අනාගමික රාජ්‍යයක් හෝ නව ධජයක් පිළිබඳ යෝජනාවක් රජය ඉදිරිපත් කර නොමැත.
ඒ අනුව මෙම කමිටු වාර්තාව මෑතකාලීන එකක් ලෙස හෝ එහි ඇතුළත් නිර්දේශ ඉදිරියේදී ක්‍රියාත්මක වීමට නියමිත ඒවා ලෙස දැක්වීම නොමග යවන සුළු වේ. එය වත්මන් රජයේ අරමුණක් ලෙස හෝ වත්මන් අග්‍රාමාත්‍යවරියගේ පෞද්ගලික අදහසක් ලෙස දැක්වීම ද නොමග යවන සුළු වේ.
Title: හරිනි අමරසූරියගේ නම සඳහන් 2016 ව්‍යවස්ථා ප්‍රතිසංස්කරණ පිළබඳ නිර්දේශ ඇතුළත් වාර්තාව, වත්මන් රජයේ සැලසුමක් ලෙස දැක්වීම නොමඟ යවන සුළුයි!
Written By: B.P Hansani
Result: Missing Context
