இலங்கைக்கு உலக வங்கியிடமிருந்து இனி இலவச தடுப்பூசிகள் கிடைக்காது எனப் பரவும் தகவலின் உண்மை என்ன?

Subscribe to our WhatsApp Channel

INTRO

உலக வங்கியால் இலங்கை அண்மையில் மீண்டும் உயர் நடுத்தர வருமானம் கொண்ட நாடாக வகைப்படுத்தப்பட்டதைத் தொடர்ந்து, இனிமேல் இலங்கைக்கு உலக வங்கியிடமிருந்து இலவச தடுப்பூசிகள் கிடைக்காது எனக் கூறி, பிரதான ஊடகங்கள் மட்டுமன்றி சமூக ஊடகங்களிலும் பல்வேறு பதிவுகள் பகிரப்பட்டு வந்தன. இது தொடர்பாக ஃபேக்ட் கிரஸண்டோ நிறுவனம் மேற்கொண்ட ஆய்வறிக்கை பின்வருமாறு.

தகவலின்விவரம் (What is the claim):

FB|FB FB|FB 

Fact Check (உண்மை அறிவோம்)

இந்தப் பதிவுகளுக்கான அடிப்படையாக இருந்தது லங்காதீப பத்திரிகையின் செய்தி அறிக்கையாகும். அதில் குறிப்பிடப்பட்டுள்ள விடயங்கள் தொடர்பான உண்மையான தகவல்கள் கீழே வழங்கப்பட்டுள்ளன.

இலவச தடுப்பூசிகளை வழங்குவது உலக வங்கி அல்ல – “Gavi” தடுப்பூசி கூட்டணியே

உலக வங்கி நாடுகளுக்கு கடன்கள் மற்றும் அபிவிருத்தி நிதி வசதிகளை வழங்கினாலும், நாடுகளின் நோய்த்தடுப்பு திட்டங்களுக்கு இலவச தடுப்பூசிகளை விநியோகிப்பது உலக வங்கியின் ஊடாக நடைபெறுவதில்லை. குறைந்த வருமானம் கொண்ட நாடுகளுக்கு சலுகைகள் மற்றும் இலவச தடுப்பூசிகள் பிரதானமாக Gavi – தடுப்பூசி கூட்டணி ஊடாகவே கிடைக்கின்றன.

உலக சுகாதார அமைப்பு, UNICEF, Bill & Melinda Gates Foundation மற்றும் உலக வங்கியும் Gavi-யின் பங்காளிகளாக உள்ளன. மேலும், Gavi சார்பில் நிதி திரட்டும் International Finance Facility for Immunisation (IFFIm) அமைப்பின் பொருளாளர் முகாமையாளராகவும் உலக வங்கி செயல்படுகிறது. எனவே, “உலக வங்கியிடமிருந்து இலவச தடுப்பூசிகள்” வழங்கப்படுகின்றன என்ற கூற்று தவறானதும், தவறாக வழிநடத்தக்கூடியதுமாகும்.

இலங்கை ஏற்கனவே தனது அடிப்படை தடுப்பூசிகளுக்கான செலவைத் தானே ஏற்றுக்கொள்ளும் சுயாதீன நாடாகும்

இலங்கையின் தேசிய நோய்த்தடுப்பு திட்டத்தின் கீழ் வழங்கப்படும் அனைத்து அடிப்படை தடுப்பூசிகளும் (Core EPI Vaccines) 1995ஆம் ஆண்டு முதல் 100% அரசாங்கத்தின் உள்நாட்டு வரவு-செலவுத் திட்ட ஒதுக்கீடுகளின் மூலம் கொள்முதல் செய்யப்படுகின்றன. இதற்காக சுகாதார அமைச்சிடம் தனியான நிரந்தர வரவு-செலவுத் திட்ட ஒதுக்கீடு (Dedicated budget line) உள்ளது. இது தொடர்பான தகவல்களை இங்கே மற்றும் இங்கே காணலாம்.

2002 முதல் 2016 வரையிலான காலப்பகுதியில் Gavi அமைப்பின் ஆதரவு இலங்கைக்கு அடிப்படை தடுப்பூசிகளுக்காக அல்லாமல், Hepatitis B (2002), Pentavalent (2008), IPV (2015) மற்றும் ஒரு சிறப்புத் திட்டமாக HPV (2017) போன்ற புதிய தடுப்பூசிகளை அறிமுகப்படுத்துவதற்கான ஆரம்பச் செலவுகளை ஈடுசெய்வதற்காக மட்டுமே வழங்கப்பட்டது.

உண்மையில், இலங்கை 2016ஆம் ஆண்டில் Gavi உதவி பெறும் நாடுகளின் பட்டியலிலிருந்து அதிகாரப்பூர்வமாக விலகிய ஆசியாவின் முதல் சில நாடுகளில் ஒன்றாகும் .

Gavi அமைப்பின் நிதி மற்றும் தடுப்பூசி ஆதரவைப் பெறுவதில் பிரதானமாகப் பாதிப்பை ஏற்படுத்துவது ஒரு நாட்டின் “தனிநபர் மொத்த தேசிய வருமானம்” (Gross National Income – GNI per capita) ஆகும்.

Gavi அமைப்பு இலங்கைக்கு முதன்முதலில் உதவி வழங்கத் தொடங்கியது 2002ஆம் ஆண்டிலேயாகும் .

Gavi அமைப்பு ஒரு நாட்டின் தனிநபர் மொத்த தேசிய வருமானம் 1,500 அமெரிக்க டொலர்களைத் தாண்டும்போது, அந்த நாடுகளை “உதவியிலிருந்து விலகும்” நாடுகளாக வகைப்படுத்த 2009ஆம் ஆண்டு தீர்மானித்தது. அதன்படி, இலங்கையின் வருமானம் இந்த வரம்பைத் தாண்டியதால், அதே ஆண்டில் இலங்கை உதவியிலிருந்து விலகும் ஆரம்பக் கட்டத்தில் (Graduation phase) நுழைந்தது.

அதன்பின்னர், இலங்கைக்கு 2010 – 2015 வரையிலான மாற்றுக் காலப்பகுதி வழங்கப்பட்டது. இந்தக் காலப்பகுதியில் Gavi உதவி படிப்படியாகக் குறைக்கப்பட்டதுடன், உள்நாட்டு நிதி ஒதுக்கீடுகள் படிப்படியாக அதிகரிக்கப்பட்டன.

இந்தப் பல ஆண்டுகால செயல்முறைக்குப் பின்னர், 2016ஆம் ஆண்டின் ஆரம்பத்திலேயே இலங்கை Gavi உதவி பெறும் நாடுகளின் பட்டியலிலிருந்து அதிகாரப்பூர்வமாகவும் முழுமையாகவும் விலகியது.

Gavi அமைப்பின் தற்போதைய (2026) உதவி பெறுவதற்கான தகுதி வரம்பு சுமார் 2,300 அமெரிக்க டொலர்களாகும். இலங்கையின் தனிநபர் வருமானம் தற்போது சுமார் 4,670 அமெரிக்க டொலர் என்ற அளவில் உள்ளது. இதன்படி, இலங்கை Gavi உதவி பெறுவதற்கான வருமான வரம்பைத் தாண்டி சுமார் 17 ஆண்டுகள் ஆகின்றன. எனவே, 2026ஆம் ஆண்டில் இடம்பெற்ற எந்தவொரு உலக வங்கியின் வருமான வகைப்பாட்டினாலும் இலங்கைக்கு புதிதாக தடுப்பூசிகள் இழக்கப்படவோ அல்லது மாற்றம் ஏற்படவோ இல்லை.

கொவிட் காலத்தில் Gavi மற்றும் UNICEF நிறுவனங்களின் சிறப்பு மனிதாபிமான உதவி

இலங்கை சில ஆண்டுகளுக்கு முன்னர், 2023–2025 காலப்பகுதியில் எதிர்கொண்ட கடுமையான டொலர் மற்றும் பொருளாதார நெருக்கடி காரணமாக, தடுப்பூசி தட்டுப்பாடு ஏற்படுவதைத் தடுப்பதற்காக Gavi மற்றும் UNICEF நிறுவனங்கள் சிறப்பு மனிதாபிமான உதவியாக மீண்டும் தற்காலிகமாக தடுப்பூசிகளை வழங்குவதற்கு தலையிட்டன. இது தொடர்பான தகவல்களை இங்கே மற்றும் இங்கே காணலாம்.

இலங்கை 2016ஆம் ஆண்டில் Gavi அமைப்பின் வழக்கமான உதவியிலிருந்து விலகியிருந்தாலும், பொருளாதார நெருக்கடி காரணமாக நாட்டில் மருந்துகள் மற்றும் டொலர் பற்றாக்குறை ஏற்பட்டது. இதன்போது, Gavi அமைப்பு தனது “நடுத்தர வருமானம் கொண்ட நாடுகளுக்கான சிறப்பு அணுகுமுறை” (Middle-Income Countries Fragility Approach) திட்டத்தின் கீழ், இலங்கைக்கு காலவரையறுக்கப்பட்ட அவசர உதவித் தொகுப்பை (Time-limited support package) அறிமுகப்படுத்தியது.

இந்தச் சிறப்பு உதவியின் கீழ், பொருளாதார நெருக்கடி நிலவிய 2023ஆம் ஆண்டு முதல், நாட்டின் குழந்தைகள் மற்றும் பாடசாலை மாணவர்களுக்கு வழங்கப்படும் அனைத்து அத்தியாவசிய தடுப்பூசி வகைகளையும் கொள்வனவு செய்வதற்கு Gavi அமைப்பு நேரடியாக நிதியுதவி வழங்கியது.

தற்போதைய நிலை (2025/2026)

Gavi பிரதிநிதிகள் 2025 ஏப்ரல் மாதம் இலங்கைக்கு விஜயம் செய்து, சுகாதார அமைச்சுடன் கலந்துரையாடல்களை மேற்கொண்டிருந்தனர். இதன்போது, எதிர்காலத்தில் இலங்கையில் அறிமுகப்படுத்தப்படவுள்ள நியூமோகாக்கல் (PCV), ரோட்டா வைரஸ் (Rotavirus) போன்ற புதிய தடுப்பூசிகளுக்குத் தொழில்நுட்ப உதவி மற்றும் சலுகை அடிப்படையிலான வசதிகளை (Technical Assistance) வழங்குவதற்கு அவர்கள் ஒப்புதல் தெரிவித்திருந்தனர்.

கொவிட் தொற்றுக்குப் பின்னர் Gavi அமைப்பின் உதவி நிறுத்தப்படவில்லை. பொருளாதார நெருக்கடியை எதிர்கொள்வதற்காக அவர்கள் வழங்கிய “தற்காலிக அவசர நிதியுதவி” காலம் மாத்திரமே நிறைவடைந்திருந்தது என்பதாகும். இலங்கைப் பொருளாதாரம் தற்போது மீண்டும் ஸ்திரமடைந்து வருவதால், அரசாங்கம் வழமைபோன்று தனது உள்நாட்டு வரவு-செலவுத் திட்டத்தின் மூலம் தடுப்பூசிகளுக்கான செலவை சுயமாக ஏற்றுக்கொள்ளும் (Self-financing) நடவடிக்கைகளை மேற்கொண்டு வருகிறது. எனவே, பத்திரிகை அறிக்கைகளில் குறிப்பிடப்படுவது போன்று இலங்கை “இலவச தடுப்பூசி நன்கொடைகளைச் சார்ந்திருக்கும்” நாடல்ல. மாறாக, பொருளாதார நெருக்கடியான காலகட்டத்தில் வழங்கப்பட்ட தற்காலிக அவசர உதவிகள் நிறைவடைந்து, அரசாங்கம் மீண்டும் தனது வழமையான சுயநிதியளிப்பு செயல்முறைக்கு மாறி வருகிறது.

இதன்படி, லங்காதீப பத்திரிகை செய்தியில் குறிப்பிடப்பட்டுள்ள “2027/2028ஆம் ஆண்டில் உலக வங்கி அல்லது Gavi அமைப்பின் உதவி இழக்கப்படும்” என்ற கருத்து  முற்றிலும் தவறானதும் தவறாக வழிநடத்தக்கூடியதுமாகும் என்பது உத்தியோகபூர்வ தரவுகளால் மேலும் உறுதிப்படுத்தப்படுகிறது.

உலக வங்கி வகைப்பாட்டுக்கும் தடுப்பூசிகளுக்கும் எந்தத் தொடர்பும் இல்லை

உலக வங்கியினால் 2026 ஜூலை 1ஆம் திகதி முதல் இலங்கை மீண்டும் “உயர் நடுத்தர வருமானம் கொண்ட நாடு” (Upper-Middle-Income) என வகைப்படுத்தப்பட்டமை, பிரதானமாக எதிர்காலத்தில் நாடு பெற்றுக்கொள்ளும் கடன்களுக்கான வட்டி விகிதங்கள் மற்றும் நிதி நிபந்தனைகளிலேயே தாக்கத்தை ஏற்படுத்தும். இலங்கையின் வருமான வகைப்பாட்டில் ஏற்பட்ட மாற்றம் தொடர்பாக நாம் ஏற்கனவே வெளியிட்டுள்ள விளக்கக் கட்டுரையை கீழே காணலாம்.

இலங்கை உயர் நடுத்தர வருமானம் கொண்ட நாடாக வகைப்படுத்தப்பட்டமை மற்றும் அடிமட்டத்தில் நிலவும் பொருளாதார நெருக்கடி தொடர்பான விளக்கம்!

Gavi அமைப்பின் தடுப்பூசி உதவிகளை பெற்றுக்கொள்வதற்கான தனிநபர் ஒருவருக்கான மொத்த தேசிய வருமான (GNI per capita) வரம்பு மிகவும் குறைந்த மட்டத்தில் உள்ளது. இலங்கை குறைந்த நடுத்தர வருமானம் கொண்ட (Lower-Middle-Income) நாடாக வகைப்படுத்தப்பட்டிருந்த காலத்தில்கூட, நாட்டின் தனிநபர் வருமானம் அந்த வரம்பைவிட கணிசமாக அதிகமாகவே இருந்தது. எனவே, 2026ஆம் ஆண்டில் இலங்கையின் வருமான வகைப்பாட்டில் ஏற்பட்ட புதிய மாற்றத்தினால் தடுப்பூசிகளைப் பெறுவதற்கான தகுதியில் எந்தவித மாற்றமும் ஏற்படாது.

உலக வங்கி ஒருபோதும் “இலவச தடுப்பூசிகளை” வழங்கவில்லை

2021 ஏப்ரல் மாதத்தில் உலக வங்கி இலங்கையில் கொவிட்-19 தடுப்பூசிகளைப் பெற்றுக்கொள்வதற்கும் அவற்றை விநியோகிப்பதற்கும் 80.5 மில்லியன் அமெரிக்க டொலர் பெறுமதியான மேலதிக நிதியுதவியை வழங்கியது. இது இலங்கை அரசாங்கத்தால் பின்னர் திருப்பிச் செலுத்த வேண்டிய கடன்/நிதி வசதியாகும். கொவிட்-19 காலப்பகுதியில் இலங்கைக்கு உண்மையில் “இலவசமாக” கிடைத்த 1.5 மில்லியனுக்கும் அதிகமான தடுப்பூசி டோஸ்கள், Gavi அமைப்பு இணைத் தலைமையேற்ற COVAX வசதி (COVAX Facility) ஊடாக மனிதாபிமான நன்கொடைகளாகவே கிடைத்தன.

எனவே, ஊடக அறிக்கைகள் உலக வங்கியின் பொதுவான கடன் நிபந்தனைகளையும் Gavi அமைப்பின் தடுப்பூசி வழங்கல் கொள்கைகளையும் ஒன்றுடன் ஒன்று தொடர்புபடுத்தி, முற்றிலும் தவறாக வழிநடத்தும் ஒரு கருத்தை உருவாக்கியுள்ளன.

உலக வங்கி

இது தொடர்பாக நாம் மின்னஞ்சல் மூலம் உலக வங்கியிடம் மேற்கொண்ட விசாரணைக்கு பதிலளித்த உலக வங்கியின் தொடர்பாடல் குழுவின் பிரதிநிதி ஒருவர் தெரிவித்ததாவது,

“சமூக ஊடகப் பதிவுகளுக்கு அடிப்படையாக அமைந்த பத்திரிகை கட்டுரையின் முதல் பக்கத் தலைப்பு உண்மைக்குப் புறம்பானது. உலக வங்கி இலங்கைக்கு இலவச தடுப்பூசிகளை வழங்குவதில்லை. தடுப்பூசி உதவிகளை Gavi (GAVI) என்ற சுயாதீன அமைப்பே வழங்குகிறது. இலங்கை தொடர்பான உலக வங்கியின் வருமான வகைப்பாடு என்பது தனியான புள்ளிவிவர அடிப்படையிலான ஒரு செயல்முறையாகும். இதன் அடிப்படையில் Gavi அமைப்பின் உதவி தீர்மானிக்கப்படுவதில்லை. லங்காதீப பத்திரிகை கடந்த 2026.09.10 ஆம் திகதி இந்த விடயம் தொடர்பில் திருத்தத்தை வெளியிட்டுள்ளது. இந்த விடயம் தொடர்பில் துல்லியமாக செய்திகளை வெளியிட விரும்பும் ஊடகங்களிடமிருந்து மேலதிக கேள்விகள் கிடைத்தால், அவற்றுக்கு பதிலளிக்க நாங்கள் தயாராக இருக்கிறோம்.”

“The front-page headline of this article is factually incorrect. The World Bank does not provide free vaccines to Sri Lanka. Vaccine support has been provided by Gavi, the Vaccine Alliance, an independent organisation with its own eligibility criteria. The World Bank’s income classification of Sri Lanka is a separate statistical exercise and does not determine Gavi’s support decisions. Lankadeepa issued a correction on this matter today (10), and we welcome further questions from media seeking to report this accurately.”

மேலும், நாம் மேலே குறிப்பிட்டுள்ளதைப் போன்று, 2021ஆம் ஆண்டு இலங்கையின் COVID-19 தடுப்பூசி திட்டத்திற்காக உலக வங்கி திட்ட நிதியுதவியை வழங்கியிருந்தாலும், தடுப்பூசிகளை நேரடியாக கொள்வனவு செய்தது அல்லது விநியோகித்தது உலக வங்கி அல்ல என்றும் அவர்கள் தெரிவித்துள்ளனர்.

Gavi அமைப்பின் பங்காளராக, International Finance Facility for Immunisation (IFFIm) நிறுவனத்திற்கான பொருளாளர் என்ற வகையில் உலக வங்கி நிதிசார் பங்களிப்பை மேற்கொள்கிறது. எனினும், Gavi அமைப்பின் உதவியைப் பெறும் நாடுகள் எவை அல்லது அந்த உதவி வழங்கப்படுவதற்கான நிபந்தனைகள் என்ன என்பதைத் தீர்மானிக்கும் அதிகாரம் உலக வங்கிக்கு இல்லை என்றும் அவர்கள் மேலும் வலியுறுத்தியுள்ளனர்.

அதேவேளை, இலங்கையின் தேசிய தடுப்பூசி திட்டத்தின் எதிர்காலம் தொடர்பான பரந்த நிலவரத்தைப் பார்க்கும்போது, லங்காதீப செய்தியில் பல முக்கியமான பின்னணித் தகவல்கள் தவறவிடப்பட்டுள்ளதாகவும் அவர்கள் குறிப்பிட்டுள்ளனர்.

இலங்கை சுகாதார அமைச்சு, பிராந்தியத்தில் காணப்படும் வலுவான தேசிய தடுப்பூசி திட்டங்களில் ஒன்றை நடைமுறைப்படுத்தி வருகிறது. இந்தத் திட்டம் தொடர்ந்து மிக உயர்ந்த தடுப்பூசி coverage விகிதத்தைப் பேணி வருகிறது. மேலும், தற்போதைய வருமான வகைப்பாடு மாற்றம் ஏற்படுவதற்கு நீண்ட காலத்திற்கு முன்பிருந்தே, அதாவது 2016ஆம் ஆண்டு முதலே, இந்தத் திட்டம் பெருமளவில் சுயநிதி அடிப்படையில், அதாவது உள்நாட்டு நிதியைப் பயன்படுத்தி, செயல்படுத்தப்பட்டு வருகிறது என்றும் அவர் குறிப்பிட்டுள்ளார்.

2026 முதல் 2030 வரையான காலப்பகுதிக்குத் தேவையான தேசிய தடுப்பூசி திட்டத்திற்கான தடுப்பூசிகளை UNICEF Global Supply Division ஊடாக கொள்வனவு செய்வதற்காக சுகாதார அமைச்சு முன்வைத்த திட்டத்திற்கு இலங்கை அமைச்சரவை ஏற்கனவே அனுமதி வழங்கியுள்ளது. இதன் மூலம், உலக சுகாதார அமைப்பினால் (WHO) முன்தகுதி பெற்ற தரமான தடுப்பூசிகளை போட்டித்தன்மை வாய்ந்த மற்றும் சலுகை விலைகளில், நம்பகமான தொடர்ச்சியான விநியோகச் சங்கிலியுடன் பெற்றுக்கொள்ள இலங்கைக்கு வாய்ப்பு கிடைக்கும் என்றும் அவர் தெரிவித்துள்ளார்.

இது சுகாதார அமைச்சிடம் காணப்படும் முன்கூட்டிய திட்டமிடல் மற்றும் நிறுவன ரீதியான திறனைத் தெளிவாக வெளிப்படுத்துவதாகவும், இலங்கையின் தடுப்பூசி திட்டத்தை எந்தவித இடையூறும் இன்றி தொடர்ந்து முன்னெடுத்துச் செல்வதற்கான மிகவும் சாதகமான அறிகுறியாக இது அமைந்துள்ளதாகவும் அவர் மேலும் குறிப்பிட்டுள்ளார்.

இலங்கையின் தடுப்பூசி திட்டம் தொடர்பான எதிர்கால உதவிகள் குறித்து துல்லியமான தகவல்களைப் பெறுவதற்காக Gavi அமைப்பு மற்றும் சுகாதார அமைச்சை நேரடியாகத் தொடர்புகொள்ளுமாறும் உலக வங்கி அறிவுறுத்தியுள்ளது.

சுகாதார அமைச்சர் நளிந்த ஜயதிஸ்ஸ

தற்போது Gavi அமைப்புடன் தடுப்பூசிகளைப் பெற்றுக்கொள்வதற்கான ஒப்பந்தம் ஏதேனும் செய்யப்பட்டுள்ளதா என சுகாதார அமைச்சரிடம் நாம் வினவினோம். இதற்கு பதிலளித்த அமைச்சர், 2025ஆம் ஆண்டின் பிற்பகுதியில் Gavi அமைப்புடன் கலந்துரையாடல்கள் இடம்பெற்றிருந்த போதிலும், தடுப்பூசிகளைப் பெற்றுக்கொள்வதற்காக அந்த அமைப்புடன் இலங்கை எந்தவொரு ஒப்பந்தத்திலும் கைச்சாத்திடவில்லை எனத் தெரிவித்தார்.

தேவையான தடுப்பூசிகள் UNICEF Global Supply Division ஊடாக கொள்வனவு செய்யப்படும் என்றும், இதற்காக சுகாதார அமைச்சினால் இலங்கை அரச மருந்தாக்கக் கூட்டுத்தாபனத்திற்கு (SPC) நிதி ஒதுக்கீடு செய்யப்படும் என்றும் அவர் தெரிவித்தார். அதன் பின்னர், SPC ஊடாக அந்தத் தொகை UNICEF Global Supply Division-க்கு செலுத்தப்பட்டு, தடுப்பூசிகள் இலங்கைக்கு பெற்றுக்கொள்ளப்படும் என்றும் அவர் குறிப்பிட்டார்.

இதன்படி, இலங்கை இலவச தடுப்பூசிகளைச் சார்ந்திருக்கும் நாடல்ல என்றும், தடுப்பூசிகளை அரசாங்கத்தின் வரவு-செலவுத் திட்டத்தின் மூலம் முழுமையாக நிதியளித்து கொள்வனவு செய்வதாகவும் அமைச்சர் தெரிவித்தார். மேலும், தடுப்பூசிகளை கொள்வனவு செய்வதற்காக சுகாதார அமைச்சு தனியான வரவு-செலவுத் திட்ட ஒதுக்கீட்டை பராமரித்து வருவதாகவும் அவர் குறிப்பிட்டார்.

இது தொடர்பாக நாம் Gavi அமைப்பிடமும் விசாரணை மேற்கொண்டுள்ளோம். அவர்களிடமிருந்து கிடைக்கும் பதிலின் அடிப்படையில் இந்தக் கட்டுரையை மேலும் புதுப்பிக்க எதிர்பார்க்கிறோம். 

Gavi அமைப்பின் நிதி மற்றும் தடுப்பூசி உதவிகளைப் பெறுவதற்கான அடிப்படைத் தகுதிகள்

Gavi அமைப்பின் நிதி மற்றும் தடுப்பூசி உதவிகளைப் பெறுவதில் முக்கியமாக தாக்கம் செலுத்துவது ஒரு நாட்டின் “தனிநபர் ஒருவருக்கான மொத்த தேசிய வருமானம்” (Gross National Income – GNI per capita) ஆகும்.

உலக வங்கியின் வருடாந்த தரவுகளை அடிப்படையாகக் கொண்டு Gavi அமைப்பு இந்தத் தகுதி அளவுகோல்களை நிர்ணயிக்கிறது. 2026ஆம் ஆண்டு முதல் நடைமுறைக்கு வரும் புதிய Gavi 6.0 மூலோபாயத் திட்டத்தின்படி, இந்தத் தகுதிகளைப் பூர்த்தி செய்ய வேண்டிய விதமும் அதன் முக்கிய கட்டங்களும் பின்வருமாறு:

1. அடிப்படை வருமான வரம்பு

ஒரு நாட்டின் தனிநபர் ஒருவருக்கான மொத்த தேசிய வருமானம் 2,300 அமெரிக்க டொலர் அல்லது அதற்குக் குறைவாக இருக்க வேண்டும். கடந்த ஆண்டு இந்த வரம்பு 1,810 அமெரிக்க டொலராக இருந்தது. நாடுகள் Gavi உதவியிலிருந்து வெளியேறும் போது எதிர்கொள்ளும் அபாயத்தைக் குறைப்பதற்காக, 2026ஆம் ஆண்டு முதல் Gavi ஆளுநர் சபையினால் இந்த வரம்பு 2,300 அமெரிக்க டொலராக அதிகரிக்கப்பட்டுள்ளது.

2. உதவி வழங்கப்படும் மூன்று முக்கிய நிதிக் கட்டங்கள்

ஒரு நாட்டின் வருமான மட்டத்தை அடிப்படையாகக் கொண்டு Gavi அமைப்பு நாடுகளை மூன்று பிரிவுகளாக வகைப்படுத்தி உதவி வழங்குகிறது:

ஆரம்ப சுயநிதியளிப்பு கட்டம் (Initial Self-Financing): உலக வங்கியின் அளவுகோலின்படி மிகவும் குறைந்த வருமானம் கொண்ட (Low-Income) நாடுகள் இதில் அடங்குகின்றன. இந்த நாடுகளுக்கு அதிகபட்ச உதவி வழங்கப்படுகிறது. தடுப்பூசிகளுக்காக அவர்கள் ஒரு டோஸுக்கு சுமார் 0.20 அமெரிக்க டொலர் போன்ற மிகக் குறைந்த நிலையான தொகையை மட்டுமே செலுத்த வேண்டும். மேலதிக தகவல்கள் இங்கே, இங்கே மற்றும் இங்கே காணலாம்.

முன் மாற்றக் கட்டம் (Preparatory Transition): ஒரு நாட்டின் வருமானம் உலக வங்கியின் குறைந்த வருமான வரம்பை விட அதிகமாக இருந்தாலும், Gavi அமைப்பின் 2,300 அமெரிக்க டொலர் வரம்பைவிடக் குறைவாக இருக்கும் நிலையாகும். இந்தக் கட்டத்தில், தடுப்பூசிகளுக்கான நாட்டின் நிதிப் பங்களிப்பு ஒவ்வொரு ஆண்டும் 15% வீதம் படிப்படியாக அதிகரிக்கப்படும்.

துரித மாற்றக் கட்டம் (Accelerated Transition): ஒரு நாட்டின் மூன்று ஆண்டு சராசரி தனிநபர் வருமானம் 2,300 அமெரிக்க டொலர் வரம்பைத் தாண்டும்போது இந்தக் கட்டம் ஆரம்பமாகிறது. இந்த நிலையில், தடுப்பூசிகளுக்காக அரசாங்கம் ஏற்க வேண்டிய செலவு ஆண்டுதோறும் வேகமாக அதிகரிக்கப்படும். எட்டு ஆண்டுகளுக்குள் Gavi அமைப்பின் நிதியுதவி முழுமையாக நிறுத்தப்பட்டு, நாடு சுயநிதி அடிப்படையிலான நிலைக்கு மாற்றப்படும். இலங்கை 2016ஆம் ஆண்டில் அதிகாரப்பூர்வமாக இந்தக் கட்டத்தை கடந்தது. மேலதிக தகவல்கள் இங்கே, இங்கே மற்றும் இங்கே காணலாம்.

3. ஏனைய சிறப்புத் தகுதிகள் மற்றும் விதிவிலக்குகள்

தொழில்நுட்ப மதிப்பீடு: நிதித் தகுதிகளைப் பூர்த்தி செய்திருந்தாலும், சம்பந்தப்பட்ட நாட்டின் தேசிய தடுப்பூசி திட்டத்தின் செயல்திறன் மற்றும் திட்டமிடல் தொடர்பில் உலக சுகாதார அமைப்பு (WHO), UNICEF உள்ளிட்ட சுயாதீன நிபுணர்கள் அடங்கிய குழுவின் அதிகாரப்பூர்வ ஒப்புதல் பெறப்பட வேண்டும். மேலதிக தகவல்கள் இங்கே மற்றும் இங்கே காணலாம்.

அவசர மற்றும் மனிதாபிமான உதவி (Catalytic Phase / Fragility Support): வருமான வரம்பைத் தாண்டியிருந்தாலும், போர், அரசியல் ஸ்திரமின்மை அல்லது இலங்கை எதிர்கொண்டதைப் போன்ற கடுமையான பொருளாதார நெருக்கடிகளை எதிர்கொள்ளும் நடுத்தர வருமான நாடுகளில் குழந்தைகளுக்கான தடுப்பூசி வழங்கல் பாதிக்கப்படுவதைத் தடுப்பதற்காக, Gavi அமைப்பு சில விசேட விதிவிலக்குகளின் கீழ் தற்காலிகமான மற்றும் சலுகை அடிப்படையிலான நிதி ஒதுக்கீடுகளை வழங்குகிறது. மேலதிக தகவல்கள் இங்கே மற்றும் இங்கே காணலாம்.

Gavi அமைப்பின் இந்தக் கொள்கைகள், உலகின் மிகவும் வறிய குழந்தைகளுக்கு சமமான முறையில் தடுப்பூசிகள் கிடைப்பதை உறுதி செய்வதை நோக்கமாகக் கொண்டுள்ளன.

2026ஆம் ஆண்டில் Gavi உதவி பெறுவதற்கான தகுதியைப் பெற்றுள்ள நாடுகள் எவை?

2026ஆம் ஆண்டு நடைமுறையில் உள்ள Gavi 6.0 மூலோபாயத் திட்டத்தின்படி, உலகில் 54 நாடுகள் Gavi உதவி பெறுவதற்கான தகுதியைப் பெற்றுள்ளன.

Gavi அமைப்பின் அதிகாரப்பூர்வ தகவல்களின்படி, இந்த நாடுகள் அவை செலுத்த வேண்டிய நிதிப் பங்களிப்பு மற்றும் வருமான மட்டத்தின் அடிப்படையில் மூன்று முக்கிய கட்டங்களாகப் பிரிக்கப்பட்டுள்ளன. அந்த நாடுகளின் பட்டியல் பின்வருமாறு:

1. ஆரம்ப சுயநிதியளிப்பு கட்டம்

உலகின் மிகவும் குறைந்த வருமானம் கொண்ட மற்றும் பொருளாதார ரீதியாக மிகவும் பாதிக்கப்படக்கூடிய நிலையில் உள்ள 26 நாடுகள் இதில் அடங்குகின்றன. இந்த நாடுகளுக்கு அதிகபட்ச நிதியுதவி வழங்கப்படுகிறது.

• ஆசிய பிராந்தியம்: ஆப்கானிஸ்தான், வட கொரியா, சிரியா, யேமன்.
• ஆப்பிரிக்கா மற்றும் ஏனைய பிராந்தியங்கள்: புர்கினா பாசோ, புருண்டி, மத்திய ஆப்பிரிக்கக் குடியரசு, சாட், காங்கோ ஜனநாயகக் குடியரசு (DR Congo), எரித்திரியா, எத்தியோப்பியா, காம்பியா, கினியா-பிசாவ், லைபீரியா, மடகாஸ்கர், மலாவி, மாலி, மொசாம்பிக், நைஜர், ருவாண்டா, சியாரா லியோன், சோமாலியா, தெற்கு சூடான், சூடான், டோகோ, உகாண்டா.

2. முன் மாற்றக் கட்டம்

தனிநபர் வருமானம் படிப்படியாக அதிகரித்து வந்தாலும், இன்னும் Gavi அமைப்பின் 2,300 அமெரிக்க டொலர் வரம்புக்குக் கீழ் உள்ள 21 நாடுகள் இதில் அடங்குகின்றன. இந்த நாடுகள் தடுப்பூசிகளுக்கான தங்களது நிதிப் பங்களிப்பை ஆண்டுதோறும் 15% வீதம் அதிகரிக்க வேண்டும்.

• ஆசிய மற்றும் பசிபிக் பிராந்தியம்: கம்போடியா, கிர்கிஸ்தான், லாவோஸ், மியான்மர் (பர்மா), நேபாளம், பாகிஸ்தான், சாலமன் தீவுகள், தஜிகிஸ்தான், அங்கோலா மற்றும் திமோர்-லெஸ்தே. (இந்த இரண்டு நாடுகளும் முன்னர் Gavi உதவியிலிருந்து வெளியேறியிருந்த போதிலும், பொருளாதார பின்னடைவு காரணமாக 2026ஆம் ஆண்டு மீண்டும் தகுதி பெற்றன.)
• ஆப்பிரிக்க மற்றும் இலத்தீன் அமெரிக்க பிராந்தியங்கள்: பெனின், கமரூன், கொமரோஸ், கினியா, ஹெய்ட்டி, கென்யா, லெசோதோ, மொரிட்டானியா, நைஜீரியா, செனகல், தான்சானியா, சாம்பியா, ஜிம்பாப்வே.

3. துரித மாற்றக் கட்டம் (Accelerated Transition Phase)

இந்த நாடுகளின் தனிநபர் வருமானம் 2,300 அமெரிக்க டொலர் வரம்பைத் தாண்டியுள்ளதால், அடுத்த சில ஆண்டுகளில் Gavi உதவியிலிருந்து முழுமையாக வெளியேறவுள்ள ஏழு நாடுகள் இவை:

• பங்களாதேஷ், கொங்கோ குடியரசு (Congo), கோட் திவார் (Côte d’Ivoire), ஜிபூட்டி, கானா, பப்புவா நியூ கினியா, சாவோ டோம் மற்றும் பிரின்சிப்பி.

இலங்கையின் நிலை

இலங்கை, இந்தியா, இந்தோனேசியா, வியட்நாம், பூட்டான், மொங்கோலியா, மாலைத்தீவு போன்ற நாடுகள் ஏற்கனவே இந்தப் பட்டியலிலிருந்து அதிகாரப்பூர்வமாக வெளியேறி (Fully Self-Financing), தங்களது சொந்த உள்நாட்டு நிதியின் மூலம் தடுப்பூசிகளை கொள்வனவு செய்யும் சுயநிதி நாடுகளாக உள்ளன.

Gavi அமைப்பு இந்த நாடுகளுக்காக தடுப்பூசிகளை கொள்வனவு செய்யும்போது, உற்பத்தியாளர்களுடன் மேற்கொள்ளும் விலை ஒப்பந்தங்கள் எவ்வாறு செயல்படுகின்றன?

சந்தையை வடிவமைத்தல் (Market Shaping) என்றால் என்ன?

Gavi அமைப்பு உலகின் மிகப்பெரிய தடுப்பூசி கொள்வனவு அமைப்புகளில் ஒன்றாக இருப்பதால், அது உலகின் வறிய மற்றும் வளர்ந்து வரும் பல நாடுகளின் தடுப்பூசி தேவைகளை ஒன்றிணைத்து (Pooled Demand), அவற்றை உற்பத்தியாளர்களிடம் முன்வைக்கிறது.

குறைந்த விலையில் தடுப்பூசிகளைப் பெறுதல்: உற்பத்தியாளர்களுக்கு நீண்டகால அடிப்படையில் அதிக அளவிலான தடுப்பூசிகளை விற்பனை செய்வதற்கான உறுதி கிடைப்பதால், அவர்கள் தடுப்பூசிகளின் உற்பத்திச் செலவு மற்றும் விற்பனை விலையை மிகவும் குறைந்த மட்டத்தில் வைத்திருக்க ஒப்புக்கொள்கிறார்கள்.

போட்டித்தன்மை மற்றும் புத்தாக்கம்: Gavi அமைப்பின் தலையீட்டின் காரணமாக, தடுப்பூசி வழங்கும் உலகளாவிய உற்பத்தியாளர்களின் எண்ணிக்கை 2001ஆம் ஆண்டில் 5 ஆக இருந்த நிலையில், 2022ஆம் ஆண்டில் 19 ஆக அதிகரித்துள்ளது.

2. Gavi உதவியிலிருந்து வெளியேறிய (Fully Transitioned) இலங்கை போன்ற நாடுகளுக்கான நன்மைகள்

Gavi உதவி பட்டியலிலிருந்து அதிகாரப்பூர்வமாக வெளியேறிய பின்னரும், நாடுகள் ஒரே நேரத்தில் நிதி நெருக்கடிக்கு உள்ளாகுவதைத் தடுப்பதற்காக Gavi அமைப்பு விசேட கொள்கைகளை (1.2.4, 1.2.8) வகுத்துள்ளது.

இலங்கை போன்ற Gavi உதவியிலிருந்து வெளியேறிய நாடுகளுக்கும், சர்வதேச உற்பத்தியாளர்களுடன் பேச்சுவார்த்தை நடத்தி Gavi அமைப்பு பெற்றுக்கொண்ட குறைந்த மற்றும் சலுகை விலையிலேயே (Gavi-negotiated prices), UNICEF கொள்வனவு சேவைகள் மூலம் தொடர்ந்து தடுப்பூசிகளை கொள்வனவு செய்வதற்கான விசேட உரிமை (1.2.3, 1.2.4) (Multi-year supplier commitments) வழங்கப்படுகிறது.

Gavi உதவியிலிருந்து வெளியேறிய நடுத்தர வருமான நாடுகளில் தடுப்பூசி வழங்கல் விகிதம் (Vaccine Coverage) குறைவதைத் தடுப்பதற்கும், நியூமோகாக்கல் (Pneumococcal) போன்ற புதிய மற்றும் அதிக விலையுள்ள தடுப்பூசிகளை அறிமுகப்படுத்துவதற்கும் Gavi அமைப்பு தொடர்ந்து தொழில்நுட்ப உதவி, நெகிழ்வான நிதி மற்றும் UNICEF Pooled Procurement சேவைகளைப் பயன்படுத்துவதற்கான வசதிகளையும் வழங்குகிறது.

இந்த நடைமுறைகளின் காரணமாக, இலங்கை 2016ஆம் ஆண்டு Gavi உதவியிலிருந்து வெளியேறியிருந்தாலும், இன்றும் சர்வதேச சந்தையில் நிலவும் அதிக விலைகளுடன் ஒப்பிடுகையில் மிகவும் குறைந்த மற்றும் சலுகை விலையில் தரமான தடுப்பூசிகளை நாட்டிற்கு கொண்டுவர சுகாதார அமைச்சினால் முடிகிறது.

லங்காதீப பத்திரிகை அறிக்கை

லங்காதீப பத்திரிகை செப்டம்பர் 09 “உலக வங்கியிடமிருந்து இலங்கைக்கு இலவச தடுப்பூசிகள் இல்லை” என்ற தலைப்பில் வெளியிட்ட கட்டுரையை தற்போது நீக்கியுள்ளது. அதற்குப் பதிலாக, “நடுத்தர வருமான நாடாக வகைப்படுத்தப்பட்டதால் இலவச தடுப்பூசிகள் கிடைக்காத நிலை” என்ற தலைப்பில் அதே விடயம் தொடர்பான கட்டுரையை வெளியிட்டுள்ளது. எனினும், அந்த அறிக்கையில் குறிப்பிடப்பட்டுள்ள விடயங்கள் இன்னும் தவறாக வழிநடத்தும் வகையிலேயே உள்ளன. அந்த அறிக்கையை இங்கே காணலாம். காப்பகப்படுத்தப்பட்ட இணைப்பு ஆகும்.

இதன் பின்னர், செப்டம்பர் 10 “இலங்கை உயர் நடுத்தர வருமானம் கொண்ட நாடா?” என்ற தலைப்பில் மேலும் ஒரு அறிக்கையையும் லங்காதீப பத்திரிகை வெளியிட்டுள்ளது. அந்த அறிக்கையை இங்கே காணலாம்.

எங்களது சமூகவலைதளபக்கங்களை பின்தொடர….

Facebook Page I Twitter Page I Instagram |  Google News Channel  |TikTok | Youtube

Conclusion: முடிவு

எமது ஆய்வின் அடிப்படையில், அண்மையில் இடம்பெற்ற வருமான வகைப்பாட்டில் ஏற்பட்ட மாற்றங்களின் காரணமாக, உலக வங்கி இலங்கைக்கு இலவசமாக தடுப்பூசிகளை வழங்குவதை நிறுத்துவதற்கான அறிகுறிகள் தென்படுவதாக பத்திரிகை ஒன்றில் வெளியான தலைப்பை அடிப்படையாகக் கொண்டு சமூக ஊடகங்களில் பரவிய கூற்று தவறானது என்பது தெரியவந்துள்ளது.

உலக வங்கி ஒருபோதும் இலவசமாக தடுப்பூசிகளை வழங்கும் நிறுவனமாக செயற்பட்டதில்லை. கொவிட்-19 காலகட்டத்திலும் இலங்கைக்கு உலக வங்கி வழங்கிய தடுப்பூசி தொடர்பான நிதியுதவி, பின்னர் திருப்பிச் செலுத்த வேண்டிய கடன் வசதியாகவே வழங்கப்பட்டது. 2021ஆம் ஆண்டின் கொவிட்-19 தடுப்பூசி திட்டத்திற்கும் உலக வங்கி, Gavi ஊடாக இலங்கைக்கு இதே அடிப்படையிலேயே நிதியுதவி வழங்கியது.

உலக வங்கி, உலக சுகாதார நிறுவனம் (WHO), UNICEF உள்ளிட்ட பல்வேறு தரப்புகளுடன் இணைந்து செயல்படும் சுயாதீன அமைப்பான Gavi, பல்வேறு நாடுகளுக்கு தடுப்பூசி உதவிகளை வழங்கி வருகிறது. எனினும், Gavi வழங்கும் தடுப்பூசி உதவியைப் பெறுவதற்கான தனிநபர் மொத்த தேசிய வருமான (GNI per capita) வரம்பை இலங்கை ஒரு தசாப்தத்திற்கும் முன்னரே கடந்துவிட்டது. இதனால், 2016ஆம் ஆண்டுக்குப் பின்னர் இலங்கைக்கு Gavi ஊடாக தடுப்பூசி உதவிகள் கிடைக்கவில்லை.

மேலும், இலங்கை தடுப்பூசி உதவிகளைச் சார்ந்திருக்கும் நாடல்ல. 1995ஆம் ஆண்டு முதல், தேசிய நோய்த்தடுப்புத் திட்டத்தின் (EPI) கீழ் வழங்கப்படும் அனைத்து அடிப்படைத் தடுப்பூசிகளும் 100 சதவீதம் உள்நாட்டு வரவு-செலவுத் திட்ட ஒதுக்கீடுகள் மூலம் கொள்வனவு செய்யப்பட்டு வருகின்றன.

உலக வங்கி இலங்கையை மீண்டும் “உயர் நடுத்தர வருமானம் பெறும் நாடு” (Upper-Middle-Income Country) என வகைப்படுத்தியிருப்பது, குறிப்பாக நாடு பெறும் சர்வதேச கடன்களின் நிபந்தனைகளிலேயே தாக்கத்தை ஏற்படுத்துகிறது.

எனவே, சில மாதங்களுக்கு முன்னர் இலங்கையின் வருமான வகைப்பாடு தொடர்பாக உலக வங்கி வெளியிட்ட செய்தியை அடிப்படையாகக் கொண்டு, அதன் விளைவாக இலங்கைக்கு தடுப்பூசிகளைப் பெறும் உரிமை இழக்கப்படும் என வெளியிடப்பட்ட செய்தி தவறாக வழிநடத்தக்கூடியதாகும்.

இவ்வாறான சந்தர்ப்பங்களில், இவற்றின் உண்மைத்தன்மையினை கண்டறிய எமது வாட்ஸ்அப் இலக்கத்திற்கு (+94721414696) தொடர்புகொள்ளுங்கள்.